पोखरा ।
रोटरी क्लब अफ पोखरा मिडटाउनको आयोजनामा शनिबार पोखरा रामबजार स्थित एसओएस हर्मन माइनर स्कुलमा वृक्षरोपण भएको छ । इनरह्विल अफ पोखरा मिडटाउन र रोक्ट्रयाक्ट क्लबको संयुक्त आयोजनामा भएको कार्यक्रममा स्कुल हाताभित्र फलफूलका बिरूवा रोपिएको हो ।

डिभिजन वन कार्यालय कास्कीका प्रमुख केदार बरालले फलफूलका बिरूवा बालग्रामका आमालाई हस्तान्तण गरी कार्यक्रम सुरुआत गरे । उनले रोटरी क्लबले बालग्राममा फलफूलका बिरूवा रोपी पुण्यको काम गरेको बताए बरालले आगामी वर्ष गरिने वृक्षरोपणका लागि वन कार्यालयले आवश्यक बिरूवा उपलब्ध गराउने प्रतिबद्वता गरे ।

रोटरी क्लब अफ पोखरा मिडटाउनका अध्यक्ष रवीन्द्रनाथ बस्तोलाको अध्यक्षतामा भएको कार्यक्रमा क्लबका पूर्व अध्यक्ष सन्तोष पोखरेल, सचिव विकास अधिकारी, एसओएस बालग्रामका निर्देशक भगतकुमार श्रेष्ठ, उप निर्देशक बाबुराम बराल लगायतले बोलेका थिए ।

क्लबले हरेक वर्ष वृक्षरोपण गर्दै आएको छ । यस वर्ष बालग्रामका बालबालिकालाई लक्षित गरी उनीहरूलाई पायक पर्ने स्थानमा फलफूलका बिरूवा रोपिएको कार्यक्रम संयोजक उपेन्द्र पौडेलले जानकारी दिए । यस वर्ष बालग्राम परिसरमा आँप, लिची, बेलौती, जापानिज कटुस, कफी, पारिजात लगायतका बिरूवा रोपिएको छ ।