पोखरा ।
साउन महिनाको तेस्रो सोमबार पोखरा १७ रातोपैह्रास्थित ओमकारेश्वर महादेव मन्दिरमा बिहानैदेखि दर्शनार्थीको भीड लागेको छ । रातोपैह्रा सामुदायिक वन समूहमा अवस्थित शिव र गणेश मन्दिरको दर्शन पूजा आराधनासहित १०८ शिवलिंगमा गाईको दूध र सेतीनदीको पवित्र जल अर्पण गर्ने श्रद्धालु भक्तजनाको भीड लागेको हो ।

साउन महिना र सोमबार भगवान शिवकोवारका रुपमा लिइन्छ । उक्त दिन शिवको पूजा आराधना एवं दर्शन गर्नाले मनोकांक्षा पूरा हुने विश्वास भक्तजनामा छ । भक्तजनले सेतीनदीमा स्नान गरी पवित्र जल ल्याएर शिवलिंगमा चढाउने प्रचलन छ ।
गाईको दूध, विभिन्न पूजा सामग्रीसहित फूल प्रसाद लिएर पोखरा आशपासबाट भक्तजन दर्शन गर्न आउने गरेको मन्दिर व्यवस्थापन समितिका अध्यक्ष देवबहादुर थापाले जानकारी दिए ।

साउन महिनाको पहिलो र दोस्रो सोमबार भन्दा तेस्रो सोमबार बढी दर्शनार्थी श्रद्धालु भक्तजनको भीड लागेको जनाउँदै उनले भने, ‘यसलाई धार्मिक क्षेत्रको रुपमा विकास गर्न सवैको साथ र सहयोग आवश्यक छ ।’ ओमकारेश्वर मन्दिर लगायत पोखराका केदारेश्वर, गुप्तेश्वर महादेव, सदाशिव हरिहर महादेव लगायतका शिवालयमा गाईको दूध र पवित्र जल चढाउने भक्तजनको भीड लागेको छ ।