पोखरा ।
पोखरा महानगरपालिकाले सघन घाँस विकास कार्यक्रमको अनुदान वितरण गरेको छ । पोखरा महानगरभित्र सघन घाँस खेती गर्ने ९३ किसानलाई १४ लाख ६५ हजार ५ सय ९० रुपैयाँ वितरण गरिएको हो ।

पोखरा महानगर पशु सेवा शाखाद्वारा आयोजित कार्यक्रममा पोखरा महानगरका उपप्रमुख मञ्जुदेवी गुरुङले अनुदान वितरण आरम्भ गरिन् । पोखरा महानगरमा आर्थिक वर्ष २०७८/७९ मा ४ सय ८९ रोपनीमा सघन घाँस लगाइएको र ७ हजार ३ सय ३५ मेट्रिक टन घाँस उत्पादन हुने महानगर पशु सेवा शाखा प्रमुख नवराज अधिकारीले जानकारी दिए ।

पोखरा महानगरले पशुपालनलाई प्रवद्र्धन गर्न प्रतिरोपनी ३ हजारका दरले किसानलाई अनुदान दिएको छ

१० रोपनीभन्दा बढी घाँस लगाउने १३ जना, ५ देखि ९ रोपनीमा लगाउने २२ जना, २ देखि माथि र ५ रोपनीभन्दा कम लगाउने कृषकको संख्या ५८ छ । महानगरले प्रतिरोपनी ३ हजारका दरले अनुदान उपलब्ध गराएको हो । ९३ जना किसानले ६ हजारदेखि ६० हजार रुपैयाँसम्म अनुदान पाएका छन् ।

सबैभन्दा बढी २० रोपनीमा घाँस लगाउने मिना तिवारी र नन्दप्रसाद पोखरेललाई जनही ६० हजार रुपैयाँ प्रदान गरियो । कार्यक्रममा महानगरका उपप्रमुख गुरुङले पोखराको आर्थिक विकासको आधार पर्यटन र कृषि रहेको बताइन् । उनले पोखरा पर्यटकीय सहर भएकाले यहाँ आउने पर्यटकलाई आवश्यक कृषि उपज उत्पादन गर्न सके कृषि क्षेत्रका लागि राम्रो हुने बताउँदै घाँस र विउ सँगसँगै उत्पादन गर्नुपर्नेमा जोड दिइन् ।

पोखरा महानगरले कृषिलाई प्रोत्साहन गर्न अनुदान, कृषि एम्बुलेन्स सञ्चालन लगायतका कार्यक्रम ल्याएको छ । उनले पोखराको पहिचानका रुपमा रहेको जेठोबुढो चामलको ब्रान्डिङ गर्ने कामसमेत गरिरहेको उल्लेख गर्दै कृषकका समस्या समाधानका गर्न महानगर तयार रहेको सुनाइन् ।

पोखरा महानगर आर्थिक विकास महाशाखा प्रमुख मनहर कडरियाले कृषि उत्पादन गर्न महानगरले अनुदान कार्यक्रम ल्याएको बताउँदै किसानका मागका आधारमा यस्ता कार्यक्रम ल्याइएको जनाए । व्यावसायिक किसान गण्डकी प्रदेश संयोजक दीपक तिमिल्सिनाले महानगरको अनुदानले किसानलाई राहत प्रदान गरेको बताए ।

२० रोपनीमा घाँस लगाएरवापत ६० हजार रुपैयाँ प्राप्त गरेका नन्दप्रसाद पोखरेलले पहिलो पटक सरकारी अनुदान प्राप्त गरेको भन्दै आफ्नालाई मात्र अनुदान दिइन्छ भन्ने कुरा अफवाह भएको प्रमाणित भएको उल्लेख गरे । ‘मैले कसैलाई भनसुन पनि गरेको होइन, । मैले खोजेको पनि हैन । महानगरले मलाई खोजीखोजी अनुदान दियो । काम गरे पाइन्छ भन्ने थाहा पाए ।’