पोखरा l
पोखरा उद्योग वाणिज्य संघको आसन्न महाधिवेशनमा अध्यक्षमा उम्मेदवारी घोषणा गरेका पवन प्रजापतीले सोमबार आफ्नो प्यानल घोषणा गर्ने भएका छन् । त्यसका लागि उनले बिहान पत्रकार सम्मेलन आयोजना गरेका छन् । अहिलेको कार्यसमितिमा वरिष्ठ उपाध्यक्ष रहेका प्रजापती अध्यक्षमा उम्मेदवारी दिने घोषणा यसअघि नै गरिसकेका थिए ।

पवनलाई अघिल्लो निर्वाचनमा एउटै टिमबाट निर्वाचन लडेका उपाध्यक्ष अर्जुन पोखरेलले चुनौती दिँदै छन् । अर्जुनले यसअघि नै पत्रकार सम्मेलन गरेर अध्यक्षमा उम्मेदवारी दिने घोषणा गरिसकेका छन् । उनले टिम भने घोषणा गरेका छैनन् । स्रोतका अनुसार पवनको टिमबाट वरिष्ठ उपाध्यक्षमा गोकर्ण कार्कीलाई उम्मेदवार घोषणा गरिँदैछ भने उद्योगतर्फको उपाध्यक्षमा हीरामणि पण्डित र वाणिज्य तर्फको उपाध्यक्ष्मा उत्तममान बुद्धाचार्य निर्वाचन लड्दैछन् ।

पवन प्यानलबाट महासचिवमा बलराम आचार्यको उम्मेदवारी घोषणा हुँदैछ । आचार्य अहिलेको कार्यसमितिमा पनि महासचिव नै छन् । त्यस्तै उपमहासचिवमा शोभा गौतम र कोषाध्यक्षमा दिनेशचन्द्र बाँस्तोलाको टिम घोषणा हुन लागेको पवन प्रजापती निकट स्रोतले समाधानलाई बतायो । पोखरा उद्योग वाणिज्य संघको अधिवेशन यही भदौको २४ र २५ गते सम्पन्न हुँदैछ ।