पोखरा ।
नेपाल लोकतान्त्रिक तमु संघको दोस्रो राष्ट्रिय सम्मेलन भदौ २४ र २५ गते पोखरामा हुने भएको छ । नेकपा एमालेको भातृ संगठन लोकतान्त्रिक आदिवासी जनजाति महासंघको महत्वपूर्ण घटक लोकतान्त्रिक तमु संघको राष्ट्रिय सम्मेलन आयोजक समितिको बैठकले राष्ट्रिय सम्मेलन गर्ने निर्णय गरेको हो ।

बैठकमा नेपाल लोकतान्त्रिक तमु संघका संस्थापक अध्यक्ष एवं नेकपा एमालेका स्थायी समिति सदस्य किरण गुरुङले राजनीतिक चेतना र नेतृत्व विना तमु लगायत समुदायले अगाडि लम्कन नसक्ने बताए । मुलुकलाई जिम्मेवार ढंगले अग्रगति एवं समृद्धिका लागि एमालेलाई सशक्त बनाउन लोकतान्त्रिक तमु संघ सशक्त हुनुपर्ने उनको भनाइ छ । नेता गुरुङले आगामी कार्यदिशाका बारेमा मार्गनिर्देशनसमेत गरे ।

बैठकले राष्ट्रिय सम्मेलन भव्यताका साथ सफल बनाउन प्रदेश, जिल्लागत सांगठनिक एवम प्रतिनिधि चयनका साथै आर्थिक दायित्वका बारेमा जिम्मेवारी तोकेको छ । सम्मेलनमा करिब ७ सय प्रतिनिधि सहभागी हुने छन् । त्यसरी नै सम्मेलनमा राजनीतिक एवं सांगठनिक प्रतिवेदन तयारीका लागि संयोजक वेदबहादुर गुरुङ र संशोधित बिधान तयारीका लागि महासचिव हुमबहादुर गुरुङलाई जिम्मेवारी तोकिएको छ ।

बैठक सञ्चालनअघि आयोजक समिति गठन कार्यक्रममा अनुपस्थित रहेका एवं छुटेका आयोजक समिति सदस्यलाई संयोजक वेदबहादुर गुरुङले पद तथा गोपनीयताको सपथ ग्रहण गराएका थिए ।