पोखरा ।
गण्डकी ट्रक यातायात व्यवसायी संघको ४५ औं वार्षिक साभारण सभा तथा २१ औ अधिवशनले आगामी कार्यकालको लागि नयाँ कार्यसमिति चयन गरेको छ । अधिवेशनबाट अध्यक्ष सुरेन्द्र त्रिपाठीको नेतृत्वमा १३ सदस्यीय नयाँ कार्यसमिति चयन गरेको संघको प्रधान कार्यालयका कार्यालय प्रमुख नारायण आचार्यले जानकारी दिए ।

संघको वरिष्ठ उपाध्यक्ष कल्याण तिमिल्सिना, प्रथम उपाध्यक्ष ईश्वरकुमार श्रेष्ठ, द्वितीय उपाध्यक्ष नेत्रबहादुर खत्री (राजन) निर्विरोध भएका छन् । संघको महासचिव रुद्रबहादुर कार्की, सचिव चोमराज थापा, कोषाध्यक्ष एकेन्द्र कुँवर र सहकोषाध्यक्ष गंगाकुमारी खनाल निर्वाचित भएका छन् । संघको कार्यसमितिको सदस्यमा प्रकाश गिरी, वीरेन्द्रराज काफ्ले, विष्णुप्रसाद पौडेल, लक्ष्मी श्रेष्ठ (ओस्ता) र शशिविक्रम राणा सर्वसम्मत भएको कार्यालय प्रमुख आचार्यले बताए ।

संघको बिहीबार भएको निर्वाचन कार्यक्रममा महासचिव, कोषाध्यक्ष र सहकोषाध्यक्ष पदमा निर्वाचन भएको थियो । अध्यक्ष लगायत अरु सबै पद निर्विरोध भएको थियो । नेपाल ट्रक यातायात व्यवसायी महासंघका केन्द्रीय अध्यक्ष हीरालाल श्रेष्ठले अधिवेशनको उद्घाटन गरेको साधारण सभाले महासचिव होमबहादुर कार्कीले पेस गरेको आर्थिक वर्ष २०७८/०७९ प्रगति प्रतिवेदन तथा आर्थिक वर्ष २०७९/०८० प्रस्तावित कार्यक्रम, कोषाध्यक्ष अनिलविक्रम खाँणले प्रस्तुत गरेको आर्थिक वर्ष २०७८/०७९ को आर्थिक प्रतिवेदन र आर्थिक वर्ष २०७९ /०८०का प्रस्तावित आयव्यय विवरण सुधार सहित पारित गरेको छ ।