पोखरा ।
नेपाली महिलाको महान पर्व हरितालिका तीजको अवसरमा आयोजना भएको पोखरा १ स्थित पुरानो टुँडिखेलमा तीज मेला २०७९ जारी छ । शुक्रबारदेखि सुरु मेला १६ भदौसम्म सञ्चालन हुनेछ । नेपाली कला, संस्कृति संरक्षण गर्ने उद्देश्यले इन्द्रेणी एकीकृत विकास केन्द्र, पोखरा १ को आयोजना तथा सुरताल इभेन्ट एन्ड मल्टिमिडिया प्रालिको व्यवस्थापनमा मेला भएको हो ।

मेलामा आइतबार आमा समूह स्तरीय मौलिक तीजगीत प्रतियोगिता, खुला तीज गृहिणी नृत्य प्रतियोगिता, अन्तर विद्यालय स्तरीय लोक नृत्य प्रतियोगिता, गण्डकी प्रदेश स्तरीय छेलो लगायतका स्पर्धा हुने आयोजक केन्द्रका भानुभक्त अधिकारीले बताए ।
मेलामा दैनिक उपभोग्य सामान, कृषि, हस्तकला, बैंक तथा वित्तीय संस्था, लत्ता कपडा लगायतका विभिन्न स्टलसँगै रेस्टुरेन्ट र बाल उद्यानसमेत छ । दैनिक राष्ट्रिय तथा स्थानीय कलाकारले दर्शकलाई मनोरञ्जन दिइरहेका छन् ।

शनिबार कृष्ण अखेली, अमर धिताल, सुनिता नेपाली, निशा पोखरेल लगायतका कालाकारले प्रस्तुति राखे । शनिबार ५ हजार हाराहारीले मेला अवलोकलन गरेको केन्द्रका कार्यसमिति सदस्य दुर्गादत्त भुगाईले बाए । आइतबार रामजी खाँड, कृष्ण अखेली, मञ्जु विक, रामजी पौडेल, बिन्द्रा परियार लगायतका कलाकारले दर्शकलाई मनोरञ्जन दिने छन् ।