पोखरा ।
गोरखा मिलन समाज पोखराले छोरेपाटनमा रहेको मानव सेवा आश्रमलाई खाद्य सामग्री सहयोग गरेको छ । २३ औं स्थापना दिवसको अवसरमा आश्रमलाई करिब २० हजार रुपैयाँ बराबरको खाद्य सामग्री सहयोग गरिएको हो । समाजका अध्यक्ष कपिल पोखरेलले आश्रमका सम्झना बास्तोला र शोभा गौतमलाई सहयोग सामग्री हस्तान्तरण गरे ।

सहयोग कार्यक्रममा बोल्दै आश्रमकी अभियन्ता सम्झना बास्तोलाले सहयोगी हातहरु निरन्तर आउने अपेक्षा गरिन् । उनले मानव सेवा आश्रममा हाल ६३ जना महिला र ६ जना काम गर्नेहरु बस्दै आएको बताउँदै सबैको सहयोगले आश्रम चल्ने बताइन् ।

गोरखा मिलन समाजका अध्यक्ष कपिल पोखरेलले समाजको तर्फबाट आफैंले रकम उठाएर सहयोग गर्न पाउँदा खुसी लागेको बताउँदै सहयोग गरिरहने प्रतिवद्धता व्यक्त गरे । मानव सेवा आश्रम सहयोग कार्यक्रमको संयोजन समाजकी सहकोषाध्यक्ष गीता खनालले गरेकी थिइन् ।

मानव सेवा आश्रममा सहयोग गरे लगत्तै मझेरी फूडमा समाजको पूर्ण बैठक सम्पन्न भएको छ । भाद्र २५ गते शनिबार हुने अधिवेशनको पूर्व तयारीको अवसरमा भएको बैठकमा सबै पूर्व अध्यक्ष, पदाधिकारीहरुले आआफ्नो धारणा राखेका थिए ।