पोखरा ।
पोखरामा प्रदेश स्तरिय खेलकुद पत्रकारिता तालिम हुने भएको छ । खेलकुद पत्रकार मञ्च गण्डककीको आयोजनामा हुने तालिम असोज ४ र ५ गते हुने मञ्चका अध्यक्ष दीननाथ बरालले जानकारी दिए । गण्डकी प्रदेशमा आयोजना हुन लागेको नवौं राष्ट्रिय खेलकुद प्रतियोगिता २०७९ लाई लक्षित गरेर तालिम हुन लागेको हो ।

तालिममा राष्ट्रिय खेलकुद परिषद, प्रदेश खेलकुद परिषद गण्डकी लगायतका विभिन्न संघ संस्थाको सहयोग रहने अध्यक्ष बरालको भनाई छ । तालिममा गण्डकी प्रदेशका कास्की सहित ११ जिल्लाकै खेलपत्रकारहरुको सहभागीता रहने उपाध्यक्ष सुरज श्रेष्ठले बताए । श्रेष्ठका अनुसार अध्यक्ष बरालकै संयोजकत्वमा तालिम सम्पन्न हुनेछ ।

नवौं राष्ट्रिय खेलकुद प्रतियोगिता असोज २८ देखि कार्तिक ३ गतेसम्म हुँदैछ । सोही प्रतियोगितामा समावेश गरिएका ३६ खेलहरुको समाचार लेखनमा सहज पुर्‍याउने उद्धेश्यले तालिम आयोजना हुन लागेको मञ्चले जनाएको छ ।