पोखरा ।
नवौं राष्ट्रिय खेलकुद प्रतियोगिताको सन्र्दभमा असोज पहिलो साता पोखरामा हुने प्रदेश स्तरीय खेलकुद पत्रकारिता तालिमलाई पोखरा महानगरपालिकाले सहयोग गर्ने भएको छ । नेपाल खेलकुद पत्रकार मञ्च गण्डकीको टोलीसँग आइतबार भएको भेटघाट कार्यक्रममा पोखरा महानगरका मेयर धनराज आचार्यले सहयोग गर्ने बताएका छन् ।

पोखरामा हुने उक्त प्रतियोगितालाई सफल पार्न महानगरले हरेक हिसाबले सहयोग गर्ने बताउँदै मेयर आचार्यले मञ्चले आयोजना गर्ने कुनै पनि कार्यक्रममा सहयोग गर्दै आएको उल्लेख गरे । पोखरा महानगरले पोखरा स्पोटर्स अवार्ड देखि विभिन्न कार्यक्रममा सहकार्य गर्दै आएकोमा महानगरलाई धन्यवाद दिदै मञ्चका अध्यक्ष दीननाथ बरालले खेल पत्रकारहरुको लागि क्षमता अभिबृद्धि गर्न तालिम आयोजना गर्न लागेको बताए ।

टोलीमा मञ्चका अध्यक्ष बरालको साथमा सल्लाहकार एकराज गिरी, रन्जन अधिकारी, सदस्य राजु गिरी, गणेश बराल लगायतको सहभागिता थियो । टोलीले पोखरा महानगरको उपप्रमुख मञ्जुदेवी गुरुङलाई पनि भेटेको थियो । राष्ट्रिय खेलकुद परिषद, गण्डकी खेलकुद परिषद लगायतका विभिन्न संघ संस्थाको सहयोगमा मञ्चले उक्त तालिम असोजको ४ र ५ गते पोखरामा गर्ने तयारी गरेको छ ।