पोखरा ।
विश्व आत्महत्या दिवस (सेप्टेम्बर १०)को अवसर पारेर सडक नाटक ‘नमाझिएको कसौडी’ प्रदर्शन गरिएको छ । आत्महत्या रोकथाममा काम गर्दै आइरहेको कोसिसको आयोजना, जिल्ला प्रहरी कार्यालय कास्की र पोखरा महानगरपालिकाको सहकार्य तथा सिबिएमको सहयोगमा नाटक प्रदर्शन गरिएको संयोजक सुदीप घिमिरेले बताए ।

पोखराको पृथ्वीचोकमा शनिबार नाटक प्रदर्शन गरिएको हो । नाटक कोसिस र मञ्जरी नाट्य समूह लमजुङले तयार पारेका हुन् । कार्यक्रममा पोखरा महानगरपालिकाका स्वास्थ्य महाशाखा प्रमुख कृष्णप्रसाद अर्यालले नाटक सन्देश मुलक भएको बताउँदै यसले केही हदसम्म आत्महत्या न्यूनीकरणमा सहयोग पुग्ने बताए ।

कोसिसका मनोविद् विनय पाण्डेले आत्महत्याको कारण र रोकथामका उपायका बारेमा प्रकाश पारे । सोहि नाटक शनिबार नै पोखरा २५ हेम्जामा समेत प्रदर्शन गरिएको छ ।