पोखरा ।
गण्डकी प्रदेश प्रहरी र जिल्ला प्रहरी कार्यालय कास्कीको आयोजनामा नेपाल प्रहरीको कार्ययोजना २०७९ अन्तर्गत आत्महत्या रोकथाम तथा न्यूनीकरणसम्बन्धी सचेतना कार्यक्रम आइतबार भएको छ । गण्डकी प्रदेशका मुख्यमन्त्री कृष्णचन्द्र नेपाली पोखरेल, मन्त्री डोबाटे विश्वकर्मा, मुख्य न्यायधिवक्ता रोहितराज बाँस्तोला, प्रमुख जिल्ला अधिकारी टेकबहादुर केसी, सामुदायिक सेवा केन्द्र, आमा समूह, क्लब, विद्यालयका पदाधिकारी गरी ६ सय जना कार्यक्रममा सहभागी थिए । ‘आत्महत्या समस्या हो, समाधान होइन’ भन्ने उद्घोषका साथ कार्यक्रम भएको हो ।

कार्यक्रममा आत्महत्या न्यूनीकरण कास्की प्रहरीका डिएसपी सुन्दर तिवारी र नशा तथा मानसिक रोज बिशेषज्ञ डा वसन्त ढुंगानाले प्रस्तुति राखेका थिए । आत्महत्या समस्या हो, समाधान होइन भन्ने चेतना नागरिकका बढाउनु जरुरी रहेको जिल्ला प्रहरी कार्यालय कास्कीका डिएसपी सुन्दर तिवारीले औंल्याए ।

संसारमा सबै जसो मानिसमा केही न केही समस्या हुने उल्लेख गर्दै उनले समाधानको उपाय आत्महत्या किमार्थ हुन नसक्ने उनले जनाए । ‘समस्या तपाईं, हामीसामु अहिले पनि छन् । भोलि पनि हुन सक्छन् । समस्यालाई समाधानको दृष्टिकोणले हेर्नुपर्छ,’ तिवारीले भने ।

नेपालमा गत आर्थिक वर्ष ६ हजार ७ सय ९२ जनाले आत्महत्या गरेका छन् । सन् २०२१ मा नेपालमा आत्महत्याको दर वृद्धि भई प्रतिलाख २३.७५ पुगेको छ । नेपालमा दैनिक सरदर १९ मानिसले आत्महत्या गर्ने गरेका छन् । कास्कीमा पनि आत्महत्याको दर बढ्दो देखिन्छ । कास्कीका आत्महत्या गर्नेको संख्या हेर्दा महिलाभन्दा पुरुष बढी देखिन्छ । ०७७/७८ मा ९५ पुरुष र ६२ महिलाले आत्महत्या गरेका छन् ।

२०७४/०७५ देखि नै बढ्दै आएको आत्महत्या दर अघिल्लो आवमा केही घटे पनि यसको रोकथाममा चुनौतिपूर्ण भएको डिएसपी तिवारीले बताए ।