पोखरा ।
कास्कीकोट दरबारमा रहेको गुप्तकालिका मन्दिरमा घटस्थापनाको विशेष साइतमा मन्दिर प्रवेश गरिएको छ । मन्दीरमा सधैझै यस वर्ष पनि विजयादशमीको अवसरमा नव दुर्गा उत्सव हुने भएको छ । तान्त्रिक र वैदिक तरिकाले पूजा हुने यो मन्दिरमा घटस्थापनादेखि दशमीसम्म पाणा पुजारी मन्दिरमा नै बसेर पूजा गर्ने प्रचलन छ ।

यहाँ नेपालमा नै लोपोन्मुख सरुङ खेल र मालश्री धुन प्रस्तुत गरिने गुप्तकाली काश्यप धार्मिक क्षेत्र विकास समिति सचिव ठाकुर प्रसाद त्रिपाठीले बताए । कास्कीकोटमा दसंैको बेलामा बजाइने नगरा, १७ औं शताब्दीका ढाल, तरवार, तोपसमेत प्रर्दशन गरिने भएको छ । सप्तमीका दिन पोखराको रामघाटबाट ल्याइएको फूलपत्र र कुँवर जातिको सरुङ खेलसँग मन्दिरमा भित्राइने प्रचलन छ ।

अष्टमीका दिन राति कालरात्रिको पूजा गरेर नवमीका दिन पञ्चवली दिने र दशमीका दिन गुप्तकालिका मन्दिरमा टीका लगाएपछि विधिवत रुपमा फूल वास्पानीमा लगेर विसर्जन गर्ने गरिन्छ । दसैं उत्सवलाई व्यवस्थित बनाउन विभिन्न उपसमिति गठन गरिएको छ । यो मन्दिरको दर्शन गर्नाले मनको इच्छा पूरा हुने जनविश्वास छ । यहाँ पूजा गर्न तथा पञ्चवली भाकल गर्नेहरुको भीड लाग्ने गर्छ । गुप्तकालिकामा कास्की राज्यको स्थापनासँगै यहाँ हरेक दसैंमा विषेश पूजा हँुदै आएको छ । यस ठाउँबाट नै कास्की जिल्लाको नामाकरण भएको मानिन्छ ।

लामो सयसम्म कोरोना कहरका कारण मन्दिरमा दर्शनार्थी जान पाएका थिएनन् । यस पटक पूजालाई व्यवस्थित बनाउन पोखरा २४ नम्बर वडा कार्यालयले आर्थिक सहयोगसँगै प्रर्वद्धनात्मक सहयोग गरेको वडाध्यक्ष भरतबहादुर अधिकारीले बताए ।