जोमसोम ।
मुस्ताङको घरपझोङ गाउँपालिकाले किसानलाई ७५ प्रतिशत अनुदानमा स्याउ प्याकिङ गर्ने कार्टुन वितरण गरेको छ । घरपझोङले चालु आर्थिक वर्षको स्वीकृत बजेट तथा कार्यक्रम अनुसार ५ वटै वडाका स्याउ किसानलाई स्याउ प्याकिङ गर्ने कार्टुन वितरण गरेको हो ।

घरपझोङले स्थानीय स्याउ किसानका माग संकलनको आधारमा ५ केजी स्याउ अट्ने ६ हजार ३ सय ५० थान कार्टुन खरिद गरी मुस्ताङ ल्याएको थियो । पालिकाले ५ वटै वडालाई स्याउ कार्टुन किसानलाई वितरण गर्ने जिम्मा दिइसकेको छ । प्रधानमन्त्री कृषि आधुनिकीकरण परियोजना, परियोजना कार्यान्वयन इकाइ मुस्ताङले मुस्ताङका स्याउ किसानलाई ५० प्रतिशत अनुदानमा २० केजी अट्ने स्याउ प्याकिङ गर्ने कार्टुन वितरण गरेकाले घरपझोङले कार्टुनमा डुप्लिकेसन हुन नदिन ५ केजी अट्ने कार्टुन वितरण गर्न थालेको हो ।

घरपझोङले स्थानीय स्याउ किसानलाई ५२ रुपैयाँपर्ने कार्टुन ७५ छुट गरी १३ रुपैयाँमा उपलब्ध गराएको हो । पालिकाले खरिद गरेका स्याउ कार्टुन अध्यक्ष मोहनसिंह लालचनले वडा स्तरमा हस्तान्तरण गरेका छन् । अध्यक्ष लालचनले ठूला स्याउ किसानले बगैचा नै ठेक्का लगाएर व्यापारीलाई बिक्री गर्ने भए पनि साना व्यापारीले फुटकर बिक्री गर्ने भएकाले पालिकाले ५ केजीको कार्टुन अनुदानमा बितरण गरेको बताए ।

‘मुस्ताङ आउने पर्यटकले कोसेलीको रुपमा स्याउ खरिद गरी लैजान्छ, हामीले प्लास्टिक मुक्त पालिका बनाउन चाहेका छौं,’ अध्यक्ष लालचनले भने, ‘पर्यटकले कोसेली लैजान सजिलो होस र किसानलाई पनि राहत होस् भन्ने हेतुले स्याउ कार्टुन् वितरण गर्न थालेका हौं ।’

पालिकाले साना स्याउ किसानलाई लक्षित गरी ५ केजीको कार्टुन वितरण गरेको कृषि अधिकृत रोशन थकालीले बताए । मुस्ताङ आएका पर्यटकले थोरै मात्रामा स्याउ खरिद गर्ने र स्याउ लैजाने प्याकिङ कार्टुन नहुँदा समस्या पर्ने गरेकोमा पालिकाले त्यसलाई सम्बोधन गरेको कृषि अधिकृत थकालीको भनाइ छ । मुस्ताङमा भदौदेखि स्याउ टिप्न सुरु भएको हो । मुस्ताङमा उत्पादित स्याउमध्ये करिव ३० प्रतिशत जिल्लामै खपत हुने गरेको छ ।