पोखरा ।
पोखरा–९ दरबारथोकमा रहेको ऐतिहासिक तर प्रचारप्रसारको अभावमा पछाडि परेको चण्डी माई मन्दिरमा नवदुर्गा पूजा तथा चण्डी पाठ सोमबार घटस्थापनाको दिनदेखि सुरु भएको छ । चण्डी माई सेवा समितिको निर्णय बमोजिम गठन भएको नवदुर्गा पूजा तथा चण्डी पाठ मुल आयोजक समितिको आयोजनामा भएको पूजा कानुन, सञ्चार तथा प्रदेश सभा मामिला मन्त्री बिन्दुकुमार थापाले सुरुआत गरे ।

मन्त्री थापाले स्थानीय आवश्यकता हेरी स्थानीय तथा प्रदेश सरकारले सहयोग गर्ने भएकाले पूजालाई निरन्तरता दिन सरकारले सघाउने बताए । सो अवसरमा टोल विकास संस्थाका उपाध्यक्ष सूर्यभक्त सिग्देल र चण्डीका आमा समूह अध्यक्ष गंगा सुवेदी, चण्डी माई मन्दिरका पुजारी प्रकाश अधिकारीले पूजा आयोजना हुनु सकरात्मक भएको बताए ।

चण्डी माई मन्दिर परिसरमा २०६९ देखि दुर्गा पुजा गरिँदै आएको छ भने मन्दिरमा निर्माण गरिएका दुर्गा, गणेश, कुमार, सरस्वती, लक्ष्मी लगायतका देवदेवीका स्थायी मुर्ति बनाइएकाले श्रद्धालु भक्तजनको भिड लाग्ने गरेको पूजा व्यवस्थापन समितिका सदस्य कृष्ण रानाभाटले बताए ।

कार्यक्रम समितिका संयोजक बुद्धिबहादुर रानाभाटको अध्यक्षतामा भएको थियो ।