पोखरा ।
पोखरा विश्वविद्यालय सेवा आयोगको अध्यक्ष पदमा नियुक्त भएका प्रा. तीर्थराज अर्याल र सदस्य पदमा नियुक्ति भएका प्राडा उमानाथ बराललाई मंगलबार पोखरा विश्वविद्यालयले स्वागत गरेको छ ।

प्रधानमन्त्री एवं पोखरा विश्वविद्यालयका कुलपति शेरबहादुर देउवाले पोखरा विश्वविद्यालय ऐन, २०५३ बमोजिम उनीहरुलाई ४ वर्षका लागि नियुक्त गरेका हुन् । अर्याल अङ्ग्रेजी र बराल राजनीतिकशास्त्रमा प्राध्यापक हुन् ।

उनीहरु दुबैलाई पोखरा विश्वविद्यालयका उपकुलपति प्रा प्रेमनारायण अर्याल र रजिस्ट्रार प्राडा दीपकबहादुर भण्डारीले विश्वविद्यालयको केन्द्रीय कार्यालय लेखनाथमा स्वागत गरे । अर्यालले शिक्षक तथा कर्मचारीको सही व्यवस्थापन गरी विश्वविद्यालयको गरिमा उचो राख्न सेवा आयोग सक्षम हुने विश्वास व्यक्त गरे ।

रजिस्ट्रार भण्डारीले सेवा आयोग विश्वविद्यालयको मेरूदण्ड भएको उल्लेख गर्दै विवादरहित तरिकाले राम्रा र सक्षम शिक्षक तथा कर्मचारी छनोटमा सेवा आयोगको योगदान महत्वपूर्ण रहने बताए ।

सेवा आयोगका नवनियुक्त अध्यक्ष अर्यालले आफूमाथि आएको जिम्मेवारीलाई अवसरको रूपमा लिई कार्य गर्ने प्रतिवद्धता गरे । सेवा आयोगका सदस्य बरालले पोखरा विश्वविद्यालयको गरिमामय अझ उचो बनाउने गरी काम गर्ने प्रतिवद्धता जनाए ।