पोखरा ।
कास्कीमा राजनीतिक दल तथा उम्मेदवारहरुले निर्वाचनका क्रममा निर्वाचन आचारसंहिता उल्लघन गरेको पाइएको छ । निर्वाचन कार्यालय पोखराको अनुगमनका क्रममा दल तथा उम्मेदवारहरुले निर्वाचन आयोगको अधिकांश दलहरुले आचारसंहिता उल्लंघन गरेको पाइएको निर्वाचन कार्यालय पोखराका प्रमुख हुमनाथ पराजुलीले जानकारी दिए ।

‘दलहरुले निर्वाचन कार्यालयको अनुमती नलिई गाडीहरु प्रयोग गरेको, सवारी साधनमा व्यानर, फ्लेक्स वोर्ड, लोगो, निर्वाचन चिन्ह भएका स्टीकर, साउन्ड सिस्टम प्रयोग गरेको पाइएको छ,’ प्रमुख पराजुलीले भने, ‘सो कार्य नगर्न राजनीतिक दल तथा उम्मेदवारहरुलाई प्रत्यक्ष कुराकानी तथा टेलीफोनमार्फत निर्देशन दिएका छौं ।’ अर्काे पटकका लागि सो कार्य नदोहोराउन, निर्वाचन आचार संहिता पूर्ण पालना गर्न र आचार संहिता विपरीत प्रयोग भएका सामग्री हटाउन राजनीतिक दल तथा उम्मेदवारहरुलाई प्रमुख पराजुलीले आग्रह गरे ।

‘आगामी दिनमा आचारसंहिता विपरीत यस्ता कार्यहरु दोहोरिएमा प्रचार प्रसारमा प्रयोग भएका सवारी साधन तथा अन्य सामग्रीहरु जफत गरी निर्वाचन आयोग ऐन २०७३, निर्वाचन ऐन २०७३ तथा प्रचलित निर्वाचन कानुन बमोजिम कारवाही हुनेछ,’ पराजुलीले भने ।

राजनीतिक दल तथा उम्मेदवारहरुले प्रचार प्रसारमा प्रयोग गर्ने सवारी साधनको अनुमती सम्बन्धित निर्वाचन अधिकृतको कार्यालयबाट लिन समेत पराजुलीले आग्रह गरे ।