पोखरा ।
नेपाल लिटरचेर फेस्टिभल दसौं संस्करण ६ देखि ११ गतेसम्म फेवाताल किनार बाराहीघाट लेकसाइडमा हुने भएको छ । आयोजक बुकवर्म फाउन्डेसनद्वारा शनिबार आयोजित पत्रकार सम्मेलनमा देशविदेशका २ सय साहित्यकार, राजनीतिज्ञ लेखक पत्रकार कलाकार, सम्पादक एवं विशिष्ट व्यक्तित्व ५५ सत्रमा सहभागी हुने जानकारी दिइयो ।

सांगीतिक साँझ र थप रोचक सामग्री समावेश गरिनेछ । गण्डकी प्रज्ञा प्रतिष्ठान सहआयोजक रहेको यो फेस्टिभलको प्रवद्र्धकमा पोखरा महानगरपालिका र सहयोगी संस्था पोखरा प्रज्ञा प्रतिष्ठान छ ।

फेस्टिभलमा सन् २०२२ का बुकर पुरस्कार विजेता श्रीलंकाली लेखक सेहान करुणातिलक, लेखक एवं पत्रकार अक्षय मुकुल, न्युयोर्क विश्वविद्यालयका सहप्राध्यापक एवं भारतीयमूलका लेखक सुकेतु मेहता लगायत ७ जना विदेशी लेखक आउँदै छन् । फेस्टिभललाई दक्षिण एसियाकै एउटा समावेशी मञ्च बनाउने उद्देश्यका आयोजकले लिएको छ । २०११ मा काठमाडौंबाट सुरु भएको फेस्टिभल कोभिडका कारण पोहोर आयोजना हुन सकेको थिएन । सन् २०१६ देखि फेस्टिभल पोखरामा हुँदै आएको हो ।

फेस्टिभल निर्देशक नीरज भारीका अनुसार फेस्टिभलमा हरेक दिन सांगीतिक प्रस्तुति रहने छ । फेस्टिभल अवधिमा पूर्वप्रधानमन्त्री केपी शर्मा ओली, नेपाली कांग्रेसका महामन्त्रीद्वय विश्वप्रकाश लामिछाने र गगन थापा लगायत वक्ता हुनेछन् । फेस्टिभल फरक क्षमता भई अब्बल रहेका व्यक्तित्वहरूको सेसन फरक अब्बल हुँदैछ । सुदूरका सिंहदरबार शीर्षक सेसनमा दार्चुला, गोरखा तथा मनाङका स्थानीय जनप्रतिनिधिहरू सहभागी हुँदैछन् ।

फेस्टिभलको सुरु दिन कवि नवराज पराजुली र उज्जवल सागरको प्रस्तुति रहने छ । फेस्टिभलमा संगीतकार गोपाल योञ्जनको सम्झनामा गोपाल सांगीतिक प्रस्तुति हुनेछ । फेस्टिभल निर्देशक नीरज भारीले अन्तर्राष्ट्रिय लेखक, कलाकार, बुद्धिजीवी र राजनीतिज्ञहरूबीच फेस्टिभललाई एक तटस्थ मञ्च बनाइएको बताए । उनले कला, साहित्यको प्रवद्र्धनमात्र नभई विचार निर्माण र समाजको आलोचनात्मक चेतलाई समेत उचाइ दिने विश्वास व्यक्त गरे । भारीले भने, ‘विचार विमर्शले देशका उच्च पदस्थ व्यक्ति एवं सरोकारवालालाई जवाफदेही बनाउन सघाउँछ र सचेत समाज निर्माण पनि भूमिका निर्वाह गर्नेछ ।’

६ दिनसम्म चल्ने फेस्टिभलमा ‘शब्द शक्ति उत्सवको एक दशक’ नारा सहित अर्थशास्त्री एवं काठमाडौं विश्वविद्यालयका रजिस्ट्रार अच्युत वाग्लेको विद्वत् प्रवचन दिनेछन् । पत्रकार सम्मेलनमा फेस्टिभेलका सदस्य भरत कोइरालाले पोखरा र नेपाल लिटरेचर फेस्टिभल पर्याय बनिसकेको बताए । ‘यो फेस्टिभललाई पोखरावासीहरूले उत्सवपूर्वक प्रतीक्षा गरिहेका छन् । यसले हामीहरुलाई उत्साहित बनाएको छ,’ कोइरालाले भने ।

फेस्टिभलले पोखरालाई सभ्य एवं सुसंस्कृत सहर बनाउन मद्दत गर्ने फेस्टिभलका सदस्य केशवशरण लामिछानेले बताए । फेस्टिभलकी सहनिर्देशक सुजाता खत्रीले देशविदेशबाट आउने पाहुनालाई सुन्दर नगरी पोखरामा स्वागत गर्न आतुर रहेको सुनाइन् । पत्रकार महासंघ कास्कीकी अध्यक्ष विमला भण्डारीले पोखराले फेस्टिभलको अपनत्व ग्रहण गर्दै गएको बताइन् । पत्रकार विकास रोकाले कोभिडका कारण अघिल्लो वर्ष रोकिएको फेस्टिभललाई पोखरेलीहरुको साथ र सहयोग लिएर फेरि निरन्तरता दिइएको बताए ।