पोखरा ।
कतारमा भइरहेको २२औं संस्करणको फिफा विश्वकपको उपाधिका लागि आइतबार राति लुसेल आइकोनिक स्टेडियममा अर्जेन्टिना र फ्रान्सबीच प्रतिस्पर्धा हुँदैछ । साविक विजेता फ्रान्स लगातार विश्वकप जित्ने अभियानमा छ भने ८ वर्षपछि फाइनल पुगेको अर्जेन्टिना सन् १९८६ पछि विश्वकप उपाधि जित्ने लक्ष्यमा छ ।

मोरक्कोलाई २–० ले पराजित गर्दै फ्रान्सले लगातार दोस्रो पटक फाइनलमा स्थान बनाएको हो । अर्जेन्टिना क्रोएसियालाई पराजित गर्दै फाइनलमा पुगेको हो । यसअघि यी दुवै टोलीले समान २ पटक विश्वकप जितेका छन् ।

१९९८ मा पहिलो पटक ब्राजिललाई पराजित गर्दै उपाधि जितेको फ्रान्सले गएको विश्वकपमा क्रोएसियालाई पराजित गर्दै दोस्रो पटक उपाधि उचालेको थियो । अर्जेन्टिनाले १९७८ मा नेदरल्याण्ड्सलाई पराजित गर्दै पहिलो पटक उपाधि जितेको थियो । १९८६ मा जर्मनीलाई पराजित गर्दै अर्को उपाधि थप्यो । त्यसपछि २ पटक फाइनलमा पुगे पनि अर्जेन्टिनाले उपाधि थप्न सकेको छैन ।

१९९० र २०१४ मा जर्मनीसँग फाइनलमा पराजित भएको थियो । त्यसअघि पहिलो विश्वकपमा पनि अर्जेन्टिना फाइनलमा पुगेको थियो । यो सँगै अर्जेन्टिना छैटौं पटक विश्वकपको फाइनल खेल्न लागेको हो । फ्रान्स भने यसअघि फाइनलमा एक पटक मात्रै पराजित भएको छ । २००६ मा इटलीसँग पराजित भएको थियो । यो उसको चौथो फाइनल हो ।

डिएगो म्याराडोनाको नेतृत्वमा विश्वकप जितेको अर्जेन्टिनाले ३६ वर्षसम्म उपाधि जित्न सकेको छैन । पछिल्लो पटक २०१४ मा फाइनल पुगेपनि लिओनल मेसीको अर्जेन्टिना फाइनलमा जर्मनीसँग अतिरिक्त समयमा पराजित भएको थियो । फेरि एक पटक मेसीले अर्जेन्टिनालाई फाइनल पुर्‍याएका छन् र अन्तिम विश्वकप खेलिरहेका मेसीका लागि विश्वकप जित्नको लागि अर्काे अवसर छ ।

फ्रान्स भने पछिल्लो सात मध्ये चौथो पटक विश्वकप फाइनल पुगेको हो । १९९८ मा पहिलो पटक विश्वकप जितेको फ्रान्स २००६ मा भने इटलीसँग पराजित भएको थियो । डिफेन्डिङ च्याम्पियन फ्रान्स लगातार दोस्रो उपाधि जित्ने दोस्रो टिम बन्ने अभियानमा छन् । विश्वकपको इतिहासमा ब्राजिलले मात्र लगातार दुई उपाधि जितेको छ ।

फ्रान्स र अर्जेन्टिनाबीचको विगत भने अर्जेन्टिनाको पक्षमा छ । अहिलेसम्म यी दुई टोलीबीच कूल १२ खेल भएको छ । जसमा अर्जेन्टिनाले ६ खेल जित्दा फ्रान्सले ३ खेल मात्र जितेको छ । यस्तै विश्वकपमा भएका प्रतिस्पर्धामा पनि अर्जेन्टिना अगाडि छ । विश्वकपमा तीन खेलमा भेट हुँदा अर्जेन्टिनाले २ खेल जितेको छ भने फ्रान्सले १ खेल जितेको छ ।

पछिल्लो पटक २०१८ मा रुसमा भएको विश्वकपको अन्तिम १६ मा फ्रान्सले अर्जेन्टिनालाई ४–३ ले पराजित गरेको थियो । यी दुईबीच सन् १९३० को विश्वकपमा पहिलो पटक भेट भएको थियो । जहाँ अर्जेन्टिनाले प्रान्सलाई १–० ले पराजित गरेको थियो । यस्तै सन् १९७८ को विश्वकपमा अर्जेन्टिनाले फ्रान्सलाई समूह चरणमा ३–१ ले पराजित गरेको थियो । यी दुईबीच बराबरी भएको तीनवटै खेलमा कुनै गोल भएको थिएन ।

• अर्जेन्टिना र फ्रान्सबीच अहिलेसम्म भएका खेल
  ­­­ वर्ष खेल नतिजा इभेन्ट
• १ १९३० फ्रान्स ०–१ अर्जेन्टिना फिफा विश्वकप
  २ १९६५ फ्रान्स ०–० अर्जेन्टिना मैत्रीपूर्ण खेल
  ३ १९७१ अर्जेन्टिना ३–४ फ्रान्स मैत्रीपूर्ण खेल
  ४ १९७१ अर्जेन्टिना २–० फ्रान्स मैत्रीपूर्ण खेल
  ५ १९७२ अर्जेन्टिना ०–० फ्रान्स ब्राजिल इन्डेपेन्डेन्स कप
  ६ १९७४ फ्रान्स ०–१ अर्जेन्टिना मैत्रीपूर्ण
  ७ १८७७ अर्जेन्टिना ०–० फ्रान्स मैत्रीपूर्ण खेल
  ८ १९७८ अर्जेन्टिना २–१ फ्रान्स फिफा विश्वकप
  ९ १९८६ फ्रान्स २–० अर्जेन्टिना मैत्रीपूर्ण
  १० २००७ फ्रान्स ०–१ अर्जेन्टिना मैत्रीपूर्ण
  ११ २००९ फ्रान्स ०–२ अर्जेन्टिना मैत्रीपूर्ण
  १२ २०१८ फ्रान्स ४–३ अर्जेन्टिना फिफा विश्वकप