पोखरा ।
आत्महत्या न्यूनीकरण तथा रोकथामका लागि राज्यको रणनीति र जनमानसमा सचेतनाको आवश्यक रहेको पोखरामा शुक्रबार आयोजित कार्यक्रममा बताइएको छ । कोशिश (राष्ट्रिय मानसिक स्वास्थ्य स्वावलम्बन संगठन) को आयोजना तथा सिबिएमको समन्वयमा मनोसामाजिक सुस्वास्थ्य तथा आत्महत्या रोकथामसम्बन्धी परियोजनामाथि लक्षित समूहसँग समीक्षा गरिएको कार्यक्रममा सरोकारवालाले यस्तो बताएका हुन् ।

कार्यक्रममा गण्डकी प्रदेशमा मानसिक स्वास्थ्य समस्याको अवस्था, स्थानीय तहमा आत्महत्या रोकथामका लागि भएको रणनीति तथा आत्महत्या न्यूनीकरणलाई प्रभावकारी बनाउन कस्ता कदम आवश्यक रहनेछ भन्ने विषयमा समीक्षा गरिएको छ । गण्डकी प्रदेशमा आत्महत्याका घटना बढ्दै गएको वक्ताहरुले बताएका छन् ।

मानसिक स्वास्थ्य समस्या समाधान र आत्महत्या रोकथामका लागि कोशिशले दिँदै आएको गेट किपर तालिम प्रभावकारी भएको कार्यक्रममा बताइएको छ । परियोजनाले आत्महत्या न्यूनीकरणमा खेलेको भूमिका र अब कस्तो भूमिका खेल्नुपर्ने विषयमा समेत समीक्षा गरिएको छ ।

कार्यक्रममा मानव अधिकारकर्मी, सामाजिक अभियन्ता, स्वास्थ्यकर्मी, जनप्रतिनिधि, सुरक्षाकर्मी, सम्बन्धित सरकारी निकायका कर्मचारी, पत्रकार, शिक्षक लगायतको प्रतिनिधिमूलक सहभागिता थियो ।