पोखरा ।
गाडी र मोटरसाइकलका सोरुमहरुमा प्राय प्रचार तथा छुटका ब्यानरहरु टासिँएका हुन्छन् । तर आचेल पोखराको धेरैजसो सोरुममा कालो ब्यानरहरु टाँसिएका छन् ।

सरकार तथा राष्ट्र बैंकको नीतिका विरोधमा पोखराका सवारी सोरुममा प्रचार र छुटका ब्यानर टासिँने ठाउँमा कालो ब्यानर टासिँएका हुन् ।

नाडा अटोमोबाइल्स एसोसियसन अफ नेपाल र पश्चिमाञ्चल अटोमोबाइल डिलर्स एसोसियसन गण्डकी प्रदेशमा आवद्ध व्यवसायीले सोरुममा कालो ब्यानर टाँसेर विरोध जनाएका हुन् ।

सरकार तथा राष्ट्र बैंकले ल्याएको अमैत्रीपूर्ण कर नीतिलाई पुनरावलोकन र सुधार गर्न सरकार र राष्ट्र बैंकलाई घच्घचाउने उद्देश्यले सोरुमहरुमा कालो ब्यानर टाँसेको पश्चिमाञ्चल अटोमोबाइल डिलर्स एसोसियसन गण्डकी प्रदेशका अध्यक्ष कृष्णप्रसाद श्रेष्ठले बताए ।

‘पहिले ७/८ प्रतिशतको ब्याजदर थियो, अहिले १४/१५ प्रतिशत पुगिसकेको छ,’ उनले भने, ‘यो अव्यावहारिक किसिमको भयो, किनभने बैंकको ब्याजदर बढिसकेपछि हरेक सामान पनि महँगो पर्छ र उपभोक्ता नै मारमा पर्छन् ।’

ब्याजदर वृद्धिले आयातमा समेत समस्या आएको अध्यक्ष श्रेष्ठले सुनाए । ‘ब्याजदर वृद्धिका कारण आयातमा पनि ठूलो समस्या आइरहेको छ, राष्ट्र बैंकले ल्याएको नीति व्यवसायी र उपभोक्ता मैत्री छैन, जसका कारण हामीले विरोध गरेका हौं,’ उनले भने ।

दोस्रो चरणअन्तर्गत सोरुममा कालो ब्यानर राखेर विरोध गरेको श्रेष्ठको भनाइ छ । ‘हामीले १६ गतेदेखि पहिलो चरणको विरोध प्रदर्शन गरेका थियौं, सरकारले नसुनेपछि दोस्रो चरणमा सोरुममा कालो ब्यानर राखेर विरोध जनाएका हौं । त्यसबाट पनि सरकारले सुनेन भने थप विरोधका कार्यक्रम गर्छौं,’ उनले भने ।

बैंकहरुको उच्च ब्याजदर, राष्ट्र बैंकले ल्याएको चालु पुँजी कर्जासम्बन्धी मार्गदर्शन, सवारीसाधन आयात गर्दा पहिले नै नगद (मार्जिन) जम्मा गर्नुपर्ने व्यवस्था लगायत विषयमा विरोध जनाउँदै व्यवसायीले विरोध गरिरहेका छन् ।

हाल बैंकको ब्याज उच्च हुँदा सवारीसाधन किन्नेहरु घटेको र व्यवसायमा असर परेको व्यवसायीको गुनासो छ । त्यस्तै चालु पुँजी कर्जासम्बन्धी राष्ट्र बैंकको व्यवस्थाले बैंकबाट ऋण लिने व्यवसायीलाई असहज हुने र लगानीयोग्य रकमको अभावले व्यवसायमा असर परेको व्यवसायीको भनाइ छ ।

ब्याजदर वृद्धिमा सरकार र राष्ट्र बैंक मुख हेराहेर भएको यमाहा सोरुमका सञ्चालक सरोज श्रेष्ठले बताए । ‘यो समयमा सबै एकजुट भएर लाग्नुपर्छ, पार्टीको हिसाबले हेर्नुहुन्न, पहिले राज्यलाई हेर्नुपर्छ, सबै ठाउँमा राजनीति नै बढी चलेको सबै जनमानसलाई थाहा छ, राष्ट्रले यस्तो गर्नु अन्यायपूर्ण छ,’ उनले भने ।

ब्याजदर छिटोभन्दा छिटो राष्ट्र बैंक, सरकार र बैंकहरु सबै मिलेर चाहिँ यसलाई न्यूनीकरण गर्नुपर्ने श्रेष्ठको भनाइ छ । ‘छिटोभन्दा छिटो राष्ट्र बैंक, सरकार र बैंकहरु सबै मिलेर चाहिँ वृद्धि ब्याजदर न्यूनीकरण गर्नुपर्छ,’ उनले भने, ‘यो सबै न्यूनीकरण गर्ने भनेको जनताका लागि हो, जनता रहे त देश रहन्छ, जनता नै रहेनन् भने देश कसरी रहन्छ ?’

नाडा अटोमोबाइल्स एसोसियसन अफ नेपाल र त्यसको शाखाहरुले देशभर नै विरोध प्रदर्शन गर्दै आएको छ । हाल निजी सवारीसाधन खरिदका लागि बैंकहरूले कुल मूल्यको ५० प्रतिशत मात्रै कर्जा प्रवाह गर्न पाउने व्यवस्था छ । गाडी किन्न चाहनेले बाँकी ५० प्रतिशत रकम नगद जुटाउनुपर्छ ।