पोखरा ।
पोखरा उद्योग वाणिज्य संघले समृद्धि स्टिल्स राष्ट्रिय औद्योगिक व्यापार मेला २०७९ सफल पार्न सघाउने वस्तुगत संघहरुलाई सम्मान गरेको छ ।

पुस १६ देखि २५ गतेसम्म पोखराको नयाँबजारमा आयोजित मेला सफल हुनुमा वस्तुगत संघहरुको भूमिका महत्वपूर्ण रहेको भन्दै संघले बुधबार प्रशंसापत्रसहित ती संघ, संस्थालाई सम्मान गरेको हो ।

संघका अध्यक्ष पवनकुमार प्रजापति, निवर्तमान अध्यक्ष नारायण कोइरालासहितले वस्तुगत संघहरुलाई प्रशंसापत्र प्रदान गरे ।

अध्यक्ष प्रजापतिले वस्तुगत संघहरु पोखरा उद्योग वाणिज्य संघको खम्बा भएको र आउँदा दिनमा पनि यस्तै सहयोगको अपेक्षा राखिएको बताए । उनले वस्तुगत संघहरुले भोगेका समस्याको जानकारी उद्योग वाणिज्य संघलाई गराउन पनि आग्रह गरे ।

संघका निवर्तमान अध्यक्ष कोइरालाले निजी क्षेत्रका समस्या समाधानका लागि संघ निरन्तर लागिपरेको बताए ।

वरिष्ठ उपाध्यक्ष गोकर्ण कार्कीले व्यवसायीका समस्यालाई लिएर यही पुस १३ गते नेपाल राष्ट्र बैंक गण्डकी कार्यालयको आयोजनामा गोष्ठी आयोजना हुन लागेको जानकारी दिँदै आफ्ना समस्या राख्न आग्रह गरे ।

संघका उपाध्यक्ष उत्तममान बुद्धाचार्यले मेला सफल हुनुको श्रेय वस्तुगत संघको सहयोग भएको उल्लेख गरे । महासचिव बलराम आचार्यले संकटग्रस्त निजी क्षेत्रलाई सहज हुने गरी नीति निर्माण तहमा हस्तक्षेपकारी धक्का दिन पोउवासंघ सधैं तयार रहेको बताए ।

कोषाध्यक्ष दिनेशचन्द्र बास्तोलाले मेला आयोजना नाफाका लागि नभएको र संघ व्यवसाय प्रवद्र्धन गर्ने उदेश्यमा सफल भएको बताए ।

उपमहासचिव शोभा गौतमले वस्तुगत संघहरुसँग सहकार्य गर्न पोउवा संघ सदैव तयार रहेको र अब सिर्जनात्मक काममा लाग्ने बेला आएको बताइन् ।

कार्यक्रममा उपस्थित वस्तुगत संघका अध्यक्ष, पदाधिकारी तथा प्रतिनिधिले सहकार्यको परम्परा निरन्तर रहने र संघका हरेक क्रियाकलापा सक्रिय सहभागिता जनाउने प्रतिवद्धता जनाए ।