पोखरा ।
कास्कीमा पिकलबल खेलको विकास एवं प्रवद्र्धन गर्न कास्की जिल्ला पिकलबल संघ गठन गरिएको छ । पोखरामा बुधबार भएको भेलाले ९ सदस्यीय तदर्थ समिति गठन गरेको हो ।

सिद्धार्थ शर्माको अध्यक्षतामा गठित समितिको उपाध्यक्षमा लक्ष्मण पोख्रेल, सचिव दीपेन्द्र पाहारी र कोषाध्यक्षमा दयाराम पन्त छन् । कार्यसमिति सदस्यमा धीरेन्द्र कार्की, देवी गुरुङ, प्रदीप नेपाली, गणेश लामा र रेखा थापा कार्की छन् ।

पिकलबल संघ गठनका लागि केन्द्रबाट तोकिएका गण्डकी विश्वविद्यालयका प्राध्यापक डा मधुसुदन सुवेदीको अध्यक्षतामा भएको भेलामा प्रदेश खेलकुद परिषदका उपाध्यक्ष धोजकुमार गुरुङले नवनिर्वाचित तदर्थ समितिका पदाधिकारीलाई बधाई दिंदै विद्यालय स्तरबाट खेलको विकास गर्न आग्रह गरे ।

उनले पिकलबल खेल नयाँ खेलको रुपमा भित्रिए पनि सहज रुपमा सबैको पहुँचमा पुर्‍याउन समितिले भूमिका खेल्नुपर्ने बताए । सो अवसरमा प्रदेश खेलकुद परिषदका सदस्य एवं खेल पत्रकार केशव पाठक, तदर्थ समितिका अध्यक्ष शर्माले समेत बोलेका थिए ।

सन् १९६५ मा अमेरिकामा पहिलो पटक सुरु भएको पिकलबल खेल विसं २०७५ मा नवीन गुरुङले नेपालमा भित्राएका थिए । गुरुङ सहारा युकेका संस्थापक अध्यक्षसमेत हुन् । उनी युकेमा रहेर विभिन्न सामाजिक तथा खेलकुद गतिविधिमा संलग्न छन् ।

विसं २०७५ मा पोखरामा पहिलो पटक एक मैत्रीपूर्ण अन्तर्राष्ट्रिय प्रतियोगितासमेत भएको थियो । नेपालको पिकलबल संघ अन्तर्राष्ट्रिय पिकलबल महासंघको सदस्यसमेत हो ।