लेखनाथ ।
महोत्सवको पनि महोत्सवको रुपमा चिनिएको लेखनाथ महोत्सव किसानका लागि समेत उत्सव साबित भएको छ । कास्कीको तालचोकमा जारी १८ औं सस्करणको लेखनाथ महोत्सवमा राखिएका ३ सय ३७ स्टलमध्ये ४५ कृषिका स्टल छन् ।

महोत्सवको पाँचौ दिनसम्म आईपुग्दा दैनिक कृषिका स्टलमा दर्शकको चासो देखिएको संघका सल्लाहकार तथा कृषि प्रदर्शनी संयोजक दयाराम तिवारीले बताए । दर्शकले कृषिका स्टलबाट केही न केही किनेको देखिन्छ ।

सुन्तला महोत्सवबाट सुरु भएको लेखनाथ महोत्सवमा दैनिक करिब पाँच सय केजीभन्दा बढी सुन्तला बिक्री भइरहेको छ । स्थानीय उत्पादनलाई बढवा दिएकाले यहाँ कृष्ती, स्याङ्जा, पर्वत र वागलुङबाट सुन्तला ल्याइने गरिएको छ ।

महोत्सवमा कास्कीकै तालका माछा ५ स्टलबाट बेच्ने व्यवस्था मिलाईएको छ भने ताजा तरकारीतर्फ २५ वटा स्टल छन् । तरकारीका स्टलमा हेमजादेखि लेखनाथ क्षेत्रका कृषकका उत्पादन छन् ।

पाँचौ दिन सोमबारमात्र करिब ७० लाखको कारोबार भएको आयोजकले दाबी गरेको छ । शनिबार र आइतबारको तुलनामा महोत्सव अवलोकन गर्नेको संख्यामा कमी आएसँगै कारोवबर पनि प्रभावित भएको हो ।

सोमबार १५ हजारले महोत्सवको अवलोकन गरेको प्रचारप्रसार संयोजक राजेन्द्र ओझाले जानकारी दिए । महोत्सवमा मनोरञ्जनका लागि प्रत्येक दिन रत्यौली कार्यक्रमदेखि लिएर विद्यालय स्तरीय कार्यक्रम, लोकदोहोरी, भजनकृतन, लाइभ कन्सर्ट, विभिन्न जातजाति, भाषाभाषीका कार्यक्रम भइरहेका छन् ।