पोखरा ।
लेखनाथमा जारी १८ औं संस्करणको लेखनाथ महोत्सवमा हालसम्म ११ करोड बराबरको कारोबार भएको छ । महोत्सवमा हालसम्म भएको कारोबार र दर्शकको उपस्थितिका कारण महोत्सव सोचेभन्दा पनि सफल हुने देखिएको महोत्सवका प्रचारप्रसार संयोजक राजेन्द्र ओझाले बताए ।

महोत्सव हालसम्म २ लाख ६५ हजार ले अवलोकन गरेका छन् । आइतबारमात्रै २५ हजार दर्शक महोत्सवमा पुगेको आयोजकले जनाएको छ । आइतबार १ करोड ४० लाखको कारोबार भएको आयोजकको दाबी छ । महोत्सव अवधिभर २ लाख ५० हजार दर्शकले अवलोकन गर्ने र १० करोड कारोबार हुने अनुमान गरेको भए पनि समापनको अघिल्लो दिन नै लक्ष्यभन्दा पनि बढी कारोबार र दर्शक आएको आयोजकले जनाएको छ ।

महोत्सवको पहिलो दिन ३० हजार दर्शकले अवलोकन गरेका थिए भने दोस्रो दिन पुस ८ गते १० हजार, पुस ९ गते २५ हजार, १० गते ३० हजार, ११ गते १५ हजार, १२ गते १५ हजार, १३ गते २०, १४ गते २० हजार, १५ गते ३५ हजार र १६ गते ४० हजार र १७ गते २५ हजार गरी कुल २ लाख ६५ हजार दर्शकले अवलोकन गरिसकेका छन् ।

महोत्सवमा मनोरञ्जनका लागि दैनिकजसो रत्यौली कार्यक्रमदेखि विद्यालय स्तरीय कार्यक्रम, लोकदोहोरी कार्यक्रम, भजनकीर्तन, लाइभ कन्सर्ट, विभिन्न जातजाति, भाषाभाषीका कार्यक्रम भइरहेका छन् । आइतबार भएको लोकदोहोरी कार्यक्रमतर्फ बद्री पंगेनी, चोलेन्द्र पौडेल, सुरेन्द्र गुरुङ, शान्ति श्री परियार, सुनिता नेपाली, मञ्जु विक र माया केसीको प्रस्तुति रह्यो । साँझको लाइभ कन्सर्टमा एलिना चौहान, देबेन्द्र बब्लु एन्ड लाइभ ब्यान्ड र र्‍यापर टुकीले स्टेज तताएका छन् ।

सोमबार लोकदोहोरी कार्यक्रमतर्फ खुमन अधिकारी, सरला पाण्डे, जीवन दहाल, पार्वती जिसी, कुमार पुन, सीता परियार, शिवहरि ढुंगाना, नवीना सुवेदी, कृष्ण अखेली, गगन गुरुङको प्रस्तुति रहनेछ ।