पोखरा ।
रेडियो सराङकोटको १६ औँ वार्षिकोत्सवको अवसरमा बुधबार अन्तर मिडियाकप फुटसल प्रतियोगिता सुरु हुदैँछ । रेडियोले स्थापनादेखि विविध समुदायमुखी सामाजिक कार्यहरु गर्दै आएकोमा यस वर्ष पोखराका मिडिया संस्थाहरुबीच मैत्रीपूर्ण सम्बन्ध गाँस्न भन्दै फुटसल प्रतियोगिता गर्न लागिएको र सो को तयारी समेत पुरा भएको रेडियोका कार्यकारी निर्देशक कृष्ण थापाले बताए ।

पोखरामा रहेका मिडियाहरु एकल तथा ३ वटा सम्म मिडिया संस्थाहरुबिच समूह बनाई प्रतियोगिता सहभागिता रहेको रेडियोका स्टेशन प्रमुख योगेन्द्र श्रेष्ठले बताए । प्रतियोगितामा प्रथम हुनेलाई नगद रु.४० हजार, दोश्रोलाई रु. २५ हजारका साथै मेडल प्रमाणपत्र सहित सहभागी खेलाडीहरुलाई विषयतगत उत्कृष्टताको आधारमा सम्मान गर्ने तयारी आयोजकले गरेको छ । सोही अवसरमा पोखरामा कार्यरत महिला पत्रकाहरुबिच मैत्रीपूर्ण खेल समेत हुने भएको छ ।

सराङकोट बहुउद्देश्यीय सहकारी संस्थाद्वारा वि.सं. २०६३ सालमा सुरु गरिएको रेडियोले यसअघि प्रतिभाको खोजी, प्रणय गजल प्रतियोगिता, पहिलो मिडियाकप, आकस्मिक रक्तदानका साथै दैनिक रुपमा रेडियो प्रसारण गर्दै आएको छ । मिडिया कप फुटसल प्रतियोगिता गणेशटोलस्थित वि.फिट स्पोर्टसमा हुने आयोजकले जनाएको छ ।