पोखरा ।
पोखराको अमरसिंह चौरमा जारी ११ औं पोखरा महोत्सवबाट पोखरामा निर्माणाधीन चिडियाखानाको अवलोकनका लागि निःशुल्क बसको ब्यवस्था गरिएको छ ।

महोत्सवमा आउने दर्शकले टिकट काटेर महोत्सवको अवलोकनसँगै महोत्सव स्थलबाट दिउँसो १ बजे र ४ बजे गरी २ सिफ्टमा निशुल्क बस सेवा उपलब्ध गराइएको महोत्सवका प्रचारप्रसार संयोजक दिनेश सुनारले जानकारी दिए ।

महोत्सव प्रवेश टिकटपछि दर्शकले निशुल्क रुपमा बस सेवाको उपलब्ध गराउनेछ । चिडियाखानामा भने दर्शकले टिकट काट्नुपर्नेछ । चिडियाखाना अवलोकनको लागि विद्यार्थीलाई १५ र सर्वसाधारणका लागि २५ रुपैयाँको टिकट लाग्ने प्रचार प्रसार संयोजक सुनारले बताए ।

युनाइटेड क्लबले महोत्सवको आयोजना गरी शिक्षा, स्वास्थ्य, खेलकुद र पर्यटन प्रवद्र्धनका लागि पोखरामा खुला चिडियाखाना निर्माणको पहलकदमी गरेको हो । दर्शकहरुले नीलगाई, हुचिल, इजिप्सियन भल्चर, मृग, बांदर लगायतका जीवजन्तु त्यहाँ अवलोकन गर्न पाउनेछन । महोत्सवको दोस्रो दिन दर्शकहरुको उल्लेख्य सहभागिता रह्यो ।

शुक्रबार लोकदोहोरीतर्फ चन्द्र शर्मा, जीवन दाहाल, कुमार पुन, शिवहस ढुंगाना, लक्ष्मी नेपाली, इन्द्रा गुरुङ, केशव देवकोटा, रचित पौडेल, तुलसा जिसीको प्रस्तुति रहनेछ भने साँझको लाइभ ब्यान्डतर्फ अभय एन्ड द स्टिम इिन्जन्सको प्रस्तुति रहनेछ ।