पोखरा ।
पोखरा महानगरपालिका वडा नम्बर १४ मा बोक्सी प्रथा विरुद्ध सचेतनामूलक कार्यक्रम भएको छ । ‘मान्छे बोक्सी हुन्न कहिल्यै राष्ट्रिय जागरण प्रतिष्ठान’ को आयोजना तथा पोखरा महानगरपालिका र महिला बालबालिका तथा ज्येष्ठ नागरिक मन्त्रालयको सहयोगमा कार्यक्रम भएको हो ।

कार्यक्रममा पोखरा महानगरपालिका वडा नं. १४ का अध्यक्ष बोधबहादुर कार्कीले अभियानको प्रशंसा गर्दै यो अभियान देशव्यापी हुनुपर्नेमा जोड दिए । उनले समाजमा अझै पनि यस्तो कुप्रथा कायम रहेकाले हरेक नागरिक यसका बिरुद्ध लाग्नुपर्नेमा जोड दिए ।

ग्रामीण भेगमा मात्रै नभई सहरी क्षेत्रमा समेत यो प्रथा कायम रहेकाले सरकारी र गैरसरकारी क्षेत्रले यस्तो प्रथा उन्मूलनका लागि प्रयास गर्नुपर्नेमा उनको जोड छ । कार्यक्रमका वक्ताले यो अभियानलाई अझै प्रभावकारी रुपमा लैजानुपर्नेमा जोड दिँदै विद्यालय स्तरबाट नै सचेतना फैलाउनुपर्नेमा विचार राखे ।

उनीहरुले बोक्सी जस्तो कुप्रथाका कारण अझै पनि नेपालका विभिन्न ठाउँमा महिलाले ज्यान गुमाउनु परेको, अंगभंग हुनुपरेको र सामाजिक बहिष्करणमा पर्नुपरेको घटनाहरु देखाउँदै यो प्रथा मानव सभ्यताको कलंकको रुपमा आएको बताए ।

मानव सभ्यतालाई नै औंला उठाउने गरी समाजमा छाएको यो प्रथम विरुद्ध सबैले एउटै आवाज उठाउनुपर्ने वक्ताहरुको भनाइ छ । अभियानका अध्यक्ष कोविदशरण उपाध्यायको अध्यक्षतामा भएको कार्यक्रममा पोखरा १४ का टोल विकास संस्थाका अध्यक्ष तथा पदाधिकारी, विभिन्न आमा समूहका अध्यक्ष तथा पदाधिकारीको सहभागिता थियो ।

अध्यक्ष उपाध्यायले यो कार्यक्रमलाई देशव्यापी रुपमा नै लैजाने बताए । उनले यो अभियानलाई अघि बढाउन चलचित्र पनि निर्माण गरेका छन् । जुन चलचित्रले देशव्यापी प्रशंसा बटुलेको थियो ।