पोखरा ।
डा सुशील श्रेष्ठलाई माघे संक्रान्ति पर्व परिवारसँगै बसेर मनाउने इच्छा थियो । झन् घरमा आमाबाबाले पनि चाडसँगै मनाउने भनिरहेका थिए । त्यही भएर सुशीलले आइतबार माघे संक्रान्तिका दिन पोखरा आउन बिहीबारै अस्पतालमा बिदाको फारम भरे । सहकर्मीहरुसँग भन्दै थिए—छोरा सानै छ, बसमा जान्नँ, जहाजमै जान्छु ।

सुशील चिकित्सक जीवनसाथी र १० महिने सन्तानसँगै आइतबार यती एयरलाइन्सको जहाजमा पोखरा आउँदै थिए । आइतबार उनीहरुसहित सवार जहाज त्यही जहाज पोखरा आइसकेर पनि सुरक्षित अवतरण हुनै पाएन । पोखरामा नवनिर्मित अन्तर्राष्ट्रिय विमानस्थलमा अवतरण हुनुपर्ने जहाज पुरानो एयरपोर्टको आकाश पुग्नै लाग्दा सेती नदीको खोंचमा झर्‍यो ।

चालक दलका ४ सहित ७२ जना सवार जहाज दुर्घटनाले ठूलो शोक निम्त्यायो । जहाज दुर्घटनाको खबर सुनेर सुशीलका बुवा मदनकाजी घटनास्थल जाँदै थिए । भिड जम्मा भइसकेको थियो । घटनास्थलसम्मै गाडी लैजान सकेनन् । वरै राखेर हिँड्न थाले । बाटैमा अशुभमात्रै सुने । मन थाम्न सकेनन् । चक्कर लाग्यो । ढल्लान् जस्तो भए । चिच्याउँदै पानी मागे ।

उनलाई चिनिरहेका पत्रकार सुनील पाण्डेले नजिकैको सार्वजनिक धाराका पानी लगिदिए । मदन सम्हालिन सकेनन् । सुनीलले भने घाइतेहरुलाई हस्पिटल लगिएको छ रे भनेर सम्झाउने प्रयत्न गरे । मदन झन् टाउको ठोक्न थाले, चक्कर लागेर ढल्न लागे । सुनीलले उनको टाउको काँधमा राखेर विस्तारै उनकै गाडी भएतिर फर्काए । आफन्तको जिम्मा लगाएर घर पठाए ।

माघे संक्रान्ति परिवारसँग मनाउने भनेरै मदनले छोराबुहारीलाई भनेका थिए । छोरा सुशीलले पनि आमाबाबा पनि बिरामी हुनुहुन्छ भनेर अफिसमा १ साताकै छुट्टी मागेका थिए । उनी काठमाडौंको राष्ट्रिय ट्रमा सेन्टरमा कार्यरत थिए । उनका सहकर्मी डा ज्ञानेन्द्र शाह शुक्रबार र शनिबार सँगसँगै एउटा सेमिनारमा सुशीलसँग रहेको बताउँछन् । भन्छन्, ‘एक साता घर (पोखरा) जाने भनेर उत्साहित थियो ।’

आफूहरु ट्रमा सेन्टरको बहिरंग र शल्यक्रियामा सधैं सँगै हुने गरेको शाहले सुनाए । ‘हामीसँगै काम गथ्र्यौं, म नहुँदा मेरो काम पनि उसले गरिदिन्थ्यो, ऊ नहुँदा म गरिदिन्थें,’ उनले सम्झिए । तर आइतबारको सुशील सवार जहाज दुर्घटनामा परेको पत्यारै नलागेको शाह सुनाउँदै थिए । ‘जहाजमै जान्छु भने पनि ऊ चढेकै जहाज होला भन्ने लाग्दै लागेन, पछि पो नामै आयो,’ उनले भने ।

अर्का सहकर्मी डा सन्तोष पौडेल सुशीललाई मिलनसार भाइका रुपमा सम्झन्छन् । भन्छन्, ‘मिलेर काम गर्ने र साह्रै ज्ञानी मान्छे हो,’ उनले भने । पौडेल पनि पोखराकै हुँदा सुशीलसँग निकटता थियो ।