पोखरा ।
अन्तिम श्रद्धाञ्जलीका लागि पत्रकार त्रिभुवन पौडेलको शव नेपाल पत्रकार महासंघ कास्की तथा प्रदेशको प्रांगणमा राखिएको छ । आइतबार पोखरामा भएको यती एयरको विमान दुर्घटनामा परेर पौडेलको निधन भएको हो ।

उनलाई मुख्यमन्त्री खगराज अधिकारी, पत्रकार महासंघका केन्द्रीय अध्यक्ष विपुल पोखरेल, पोखराका मेयर धनराज आचार्य, माओवादी संसदीय दलका प्रमुख सचेतक हितराज पाण्डे लगायत सयौं शुभचिन्तकहरुले श्रद्धाञ्जली अर्पण गरे । श्रद्धाञ्जलीपश्चात् मंगलबार रामघाटमा उनको अन्त्येष्टि गरिनेछ ।

पोखरा हटलाइन दैनिकका सम्पादक पौडेल नेपाल पत्रकार महासंघका केन्द्रीय सदस्य, नेपाल प्रेस सेन्टरको केन्द्रीय उपाध्यक्षसमेत हुन् । उनले कृष्णबहादुर महारा अर्थमन्त्री हुँदा प्रेस संयोजक भएर काम गरेका थिए ।