पोखरा ।
पोखरा १७ महतगौंडा ढुंगेसाँघुमा २४ औं माछापुच्छ्रे फुलकन्ट्रयाक कराँते प्रतियोगिता भएको छ । नेपाल स्ट्रोंगेस्ट क्योकुशिन काईकान कराँत आइकेओके सोनादा ग्रुप नेपाल अन्तर्गतको कराँते संघ कास्कीको आयोजनामा प्रतियोगिता भएको हो ।

खेलकुद परिषदका वोर्ड सदस्य राजेश कु गुरुङले खेलकुदले खेलाडीको शारिरीक, मानसिक, तथा बौद्धिक विकासमा टेवा पुर्‍याउने बताए । आगामी दिनमा प्रतियोगिता सफल बनाउन पूर्ण सहयोग गर्ने उनकाे भनाइ थियाे ।

नवौँ राष्ट्रिय खेलकुद २०७९ मा उत्कृष्ट नतिजा ल्याएका खेलाडी रूपक नेपाली, आतेश बुढाम शिव भुजेल, पुष्प कुँवरलाई जनहि ३ हजार तथा प्रमाणपत्र प्रदान गरिएको संघका अध्यक्ष कृष्णबहादुर नेपालीले बताए ।

पुरुषतर्फ ३०, ३५, ४०,४५ र ५० केजी तौल समुहकोबिच प्रतियोगिता भएको थियो । महिला तर्फ ३५ र ४५ केजी तौल समुहबिचमा प्रतिस्पर्धा भएको थियो । प्रतियोगितामा कास्की, रुपन्देही, धादिङ, स्याङजा, नुवाकोटगरि २५०जनाको सहभागी रहेको अध्यक्ष नेपालीले जानकारी दिए ।

प्रतियोगिताका उत्कृष्ट खेलाडीलाई शिल, मेडल र प्रमाण पत्र सहित नगद दिइएको थियो । मुख्य जुरीको रूपमा, रूपक नेपाली, रत्नबहादुर आले मगर थिए भने सहायक जुरीका रूपमा गणेश लामा र बिजय आले मगर थिए ।
संघका उपाध्यक्ष विजय आले मगर, भिमसेन कार्कीले प्रतियोगिताले खेल क्षेत्रमा योगदान पुर्याएका बताएका थिए ।

कार्यक्रमको अध्यक्षमा संघका अध्यक्ष नेपाली थिए । कार्यक्रम सञ्चालन नेपाल क्योकुशिन काईकानका कास्कीका अध्यक्ष प्रकाश क्षेत्रीले गरेका थिए ।