पोखरा ।
पोखराको अमरसिंह चौरमा जारी पोखरा महोत्सवमा सातौं दिनसम्म आइपुग्दा साढे ३ करोड कारोबार भएको छ । ८० हजार दर्शकले महोत्सव प्रत्यक्ष अवलोकन गरेको महोत्सवका अर्थ तथा स्टल व्यवस्थापन उपसमिति संयोजक सूर्यबहादुर बानियाले जानकारी दिए ।

महोत्सवमा विशेष गरी जाडो यामका सामग्री, घरायसी प्रायोजनको सामाग्री, विद्युतीय प्रयोजनका सामग्रीसँगै तरकारीको बिक्री, वितरण भएको छ । अवलोकनका लागि आउने दर्शकले निशुल्क स्वास्थ्य जाँचको समेत सेवा पाउने भएका छन् ।

महोत्सवमा आउने दर्शकलाई लक्षित गरी आयोजक युनाइटेड क्लबले लाइफ केयर डाइनोस्टिक सेन्टर न्युरोड, मेडिप्लस हस्पिटल एन्ड ट्रमा सेन्टर रानीपौवा र नरहरि पोलिक्लिनिक रामबजारको सहयोगमा निशुल्क रुपमा सुगर र प्रेसरको चेकजाँचको व्यवस्था मिलाएको महोत्सव प्रचारप्रसार संयोजक दिनेश सुनारले जानकारी दिए ।

प्रेसर र सुगरसँगै महोत्सवमा आउने दर्शकले तीनवटै स्वास्थ्य संस्थाबाट अन्य चेकजाँचमा ५० प्रतिशत छुट पाउने महोत्सवका प्राथमिक उपचार संयोजक नरहरि पनेरुले जानकारी दिए । महोत्सवको सातौ दिनमात्रै २ सय जनाले सुगर निशुल्क परीक्षण गरेका छन् ।

महोत्सवमा मंगलबार चर्चित लोकदोहोरी गायिका प्रिती आलेले लोकदोहोरीमार्फत दर्शकलाई मनोरञ्जन प्रदान गरिन् । सँगै लोकदोहोरी कलाकार जीवन दाहाल, शिवहरि ढुंगाना, निश्चल दवाडी, मञ्जु विक, सरीता सारुमगर, टस गुरुङ, तुलसा जिसी लगायतले पनि प्रस्तुति राखे । साँझको लाइभ कन्सर्टमा झिल्के एन्ड द कम्पनीको प्रस्तुति रह्यो ।

बुधबार लोकदोहोरीतर्फ बद्री पंगेनी, जीवन दाहाल, चोलेन्द्र पौडेल, पार्वती जिसी, अमर धिताल, माया गुरुङ, प्रेमराज अधिकारी, सुनमा गुरुङ लगायतको प्रस्तुति रहनेछ भने साँझको लाइभ कन्सर्टतर्फ एएसएमको प्रस्तुति रहनेछ । महोत्सवमा जारी विद्यालय स्तरीय लोकनृत्य प्रतियोगितामा मेट्रोपोलिटन एकेडेमी र भ्युप्वाइन्ट बोर्डिङ स्कुल अघिल्लो चरणमा प्रवेश गरेका छन् ।

बुधवार कालिका मावि, राष्ट्रिय मावि, कास्की मोडनाइज एकेडेमी, टप्स बोर्डिङ स्कुल, अमरसिंह मावि र बेसलाइन एकेडेमीबीच प्रतिस्पर्धा हुनेछ ।