काठमाडौं ।
सिम्रिक हेलिकोप्टरले बेल ५०५ मोडलको जेट रेन्जर–एक्स सिरिजको हेलिकोप्टर सञ्चालन गर्ने भएको छ । नेपालमा यो हेलिकोप्टर पहिलो पटक आउन लागेको हो । कम्पनीले ४ वर्षअघि नै २ हेलिकोप्टर ल्याएर चलाउने व्यवसायिक योजना अगाडि बढाएको थियो । कम्पनी प्रवक्ता करुणा थापाका अनुसार जेट रेन्जर एक्स हेलिकोप्टरमार्फत डेढ महिनाभित्रै सेवा सुरु गरिनेछ ।

‘कम्पनीको योजना कोभिड कारण रोकिएको थियो । व्यवसायिक योजना अहिले अगाडि बढाएका हौं,’ उनले भनिन्, ‘अहिले अवस्था सामान्य हुँद छ । हामी सुरुमा एउटा हेलिकोप्टर ल्याउँछौं ।’ यो हेलिकोप्टर लिन कम्पनीका पाइलट र प्राविधिक सोमबार नै सिंगापुर गएका छन् ।

हाल उडान सञ्चालन गर्दै आएको एयरबसको हेलिकोप्टरका तुलनामा रेन्जर एक्स नेपाली आकाशका लागि नयाँ हुनुका साथै उद्धारको काम थप सहज हुने कम्पनीको दाबी छ । हाल यो सिरिजको हेलिकोप्टरको अन्तर्राष्ट्रिय बजार मूल्य करिब १६ करोड रुपैयाँ छ ।

हाल सिम्रिकले एउटा ६ सिटे बेल–४०७ र तीन वटा पाँच सिटे एयरबस एच–१२५ सिरिज गरी चार हेलिकोप्टरमार्फत व्यवसाय सञ्चालन गर्दै आएको छ । चालकसहित पाँचवटा सिट क्षमताको हेलिकोप्टरको ककपिटमा पूर्णरूपमा डिजिटल संयन्त्र जडान गरिएको उनको भनाइ छ ।

ल्याउन लागेको हेलिकोप्टर अत्याधुनिक प्रविधियुक्त हुनेछ । ककपिटदेखि पाइलटलाई आवश्यक जानकारी सम्प्रेषणका लागि डिजिटल प्रविधिको सुविधा छ । जेट रेन्जर–एक्स सिरिजको हेलिकोप्टर खरिद गर्ने भएपछि कम्पनीले ४ वर्षअघि नै परीक्षण उडान गर्न लगाइसकेको छ ।

हेलिकोप्टरमा २० हजार मिटर उचाइसम्म उडान गर्ने क्षमता रहेको कम्पनीले जनाएको छ । एउटा बेल रेन्जर थपिएलगत्तै कम्पनीका हेलिकोप्टर संख्या ५ पुग्नेछ ।