पोखरा ।
पोखरामा आएको रामपुर बचत तथा ऋण सहकारी संस्था लिमिटेडको टोलीले पाल्पाली बहुउद्देश्यीय सहकारी संस्थाका सञ्चालकसँग छलफल गरेको छ । कार्यक्रममा पाल्पाली बहुउद्देश्यीय सहकारीका अध्यक्ष चिरञ्जीवी श्रेष्ठले २०७६ सालमा स्थापना भएको सहकारी प्रारम्भिक चरणमा रहेको बताए ।

उनले सहकारीले पोखरा १५ मा कृषि फारम खोलेको जानकारी दिए । रामपुर बचत तथा ऋण सहकारी संस्थाका अध्यक्ष गुरुप्रसाद रेग्मीले २०६५ सालमा सबभन्दा पहिला मर्जको नीति लिएर अर्को सहकारीसँग मर्ज गरी कारोबार बढाएको उल्लेख गरे ।

उनले सहकारीका सञ्चालक सेयर सदस्यको ज्ञान सीप र क्षमता अभिवृद्धिका लागि अध्ययन, अवलोकन भ्रमण गरेको जानकारी दिए । उनले ४ हजार २ सय ७७ सेयर सदस्य रहेको सहकारीले ५५ करोड ४० लाख कारोबार गरेको बताए ।

कार्यक्रममा लुम्बिनी प्रदेश सभाका सदस्य राजु श्रेष्ठले पोखरालाई कर्मथलो बनाएका पाल्पालीले नेपाली परिवेश अनुसारको सामाजिक सेवाका अलवा व्यावसायिक बन्ने प्रयास गरेको बताए । ‘पोखरामा बसेर पाल्पाको पर्यटन प्रवद्र्धन, सामाजिक, शिक्षा तथा स्वास्थ्यको क्षेत्रमा राम्रो काम भएको छ,’ उनले भने, ‘जन्मस्थान र कर्मस्थान दुबैलाई जोडेर पर्यटकीय विकासका लागि गतिविधि अगाडि बढाइएको छ ।’ उनले पाल्पा मुल घर भई गण्डकी प्रदेशमा पेशा, व्यवसाय गर्नेले लुम्बिनी प्रदेशको गरिमा बढाउने काम गरेको दाबी गरे ।

सहकारीका निवर्तमान अध्यक्ष तथा पाल्पा हाउस प्रालिका अध्यक्ष कुलप्रसाद घिमिरेले प्रेमको प्रतीक रानीमहलको स्वरुपमा खोलिएको पाल्पा हाउसलाई गण्डकी र लुम्बिनीको प्रेमको प्रतीकको रुपमा विकास गर्न सहयोग गर्न आग्रह गरे ।

सहकारीका सचिव तथा पाल्पाली समाज पोखराका अध्यक्ष रेशम रचक थापाले कृषि र पर्यटनलाई जोडेर व्यवसाय गरेको खण्डमा जीविकोपार्जन र पर्यटन प्रवद्र्धनमा टेवा पुर्‍याउन सकिने बताए ।

कार्यक्रममा पाल्पाली समाज पोखराका प्रथम उपाध्यक्ष बालचन्द्र परियार, महासचिव केशव नेपालले सहकारीका समस्याका बारेमा बोलेका थिए ।