पोखरा ।
अञ्जुली आवासीय माध्यमिक विद्यालय र न्यु ग्यालेक्सी इङ्लिस सेकेन्डरी बोर्डिङ स्कुलको संयुक्त आयोजनामा शिक्षकलाई २ दिने तालिम दिइएको छ । शिक्षण सकाई गुणस्तर बनाउने उद्देश्यका साथ तालिम आयोजना गरिएको न्यु ग्यालेक्सीका संस्थापक निर्देशक राजु कायस्थले बताए ।

तालिममा ३२ शिक्षक सहभागी थिए । पूर्व बाल्यकाल शिक्षा, बाल विकास तथा मस्तिष्क विकास, कक्षा व्यवस्थापन, सिकाईका तौरतरिका, पाठ्ययोजना र पाठ्यक्रम मूल्यांकन जस्ता विषयमा तालिममा प्रकाश पारिएको थियो । कल्पवृक्ष एजुकेसन फाउन्डेशनकी निर्देशक प्रतीक्षा गौतमले सहजीकरण गरेकी थिईन् ।

‘शिक्षण अभ्यासमार्फत विद्यालयको शैक्षिक गुणस्तर वृद्धि गर्नका लागि यो तालिम आयोजना गरिएको हो’, अञ्जुली आवासीय माध्यामिक विद्यालयका संस्थापक निर्देशक राजु केसीले भने, ‘शैक्षिक गुणस्तर वृद्धिका लागि तालिम कोषेढुंगा साबित हुनेछ ।’

कार्यक्रममा नेसनल प्याब्सन कास्की अध्यक्ष हेमन्त अधिकारीले शैक्षिक गतिविधिलाई चुस्त बनाउनका लागि यस्ता तालिमको खाँचो औंल्याए । हिसान गण्डकी प्रदेशका वरिष्ठ उपाध्यक्ष डा. रामजी शर्माले सिकाइ कहिल्यै नसकिने बताउँदै समय अनुकूल शिक्षा प्रदान गर्न तालिम अपरिहार्य हुने विचार राखे ।