पोखरा ।
नेपाल कम्युनिस्ट पार्टी (माओवादी केन्द्र) निकट यातायात व्यवसायीको छाता संगठन नेपाल गणतान्त्रिक यातायात व्यवसायी संगठनको अध्यक्षमा ज्ञानेन्द्र श्रेष्ठ चुनिएका छन् ।

शनिबार राति काठमाडौँमा सकिएको प्रथम राष्ट्रिय अधिवेशनले श्रेष्ठको अध्यक्षतामा ७५ सदस्यीय कार्यसमिति निर्विरोध निर्वाचित गरेको हो । वरिष्ठ उपाध्यक्षमा किरणकुमार रिजाल, प्रथम उपाध्यक्षमा हुकुमसिंह नेपाली, द्वितीय उपाध्यक्षमा ऐनकुमार शाही, तृतीय उपाध्यक्षमा कान्छाराम थिङ र महासचिवमा सरोज खनाल छन् । अधिवेशनले गण्डकी प्रदेशको संयोजकमा प्रकाशमणि तिवारीलाई जिम्मेवारी दिएको छ ।

उपमहासचिवमा टेकप्रसाद बस्याल, गान्धीराज गिरी र रामहरि श्रेष्ठ, सचिवमा रुपकलाल श्रेष्ठ, रामचन्द्र भुसाल र चिनिबहादुर बोहोरा, कोषाध्यक्षमा पुरुषोत्तम सिंखडा र सहकोषाध्यक्षमा गोपबहादुर ठकुरी निर्वाचित बने । संगठनका पूर्वअध्यक्ष डोलनाथ खनाल प्रमुख सल्लाहकार बनाइएका छन् ।