पोखरा ।
पोखरा महानगरपालिका वडा नम्बर ३ कार्यालयले कन्या क्याम्पस पोखरालाई ४ लाख रुपैयाँ बराबरको साउन्ड सिस्टम र फर्निचर हस्तान्तरण गरेको छ । सामग्री हस्तान्तरण गर्दै वडा नम्बर ३ का अध्यक्ष प्रकाशमान उदासले नारी शिक्षामा समर्पित गण्डकी प्रदेशको एकमात्र क्याम्पसको गुणस्तर अभिवृद्धि गर्न यस्तो सहयोग प्रदान गरेको बताए ।

कन्या क्याम्पस पोखराका सञ्चालक समिति अध्यक्ष योगेन्द्र प्रधानले वडाको सहयोगबाट छात्राहरुलाई अतिरिक्त कार्यक्रम सञ्चालन गर्न सहयोग पुग्ने विश्वास व्यक्त गरे । क्याम्पस प्रमुख सुरेशकुमार मानन्धरले वडाबाट क्याम्पसले निरन्तर सहयोग प्राप्त गरिरहेको सुनाए । उनले छात्राहरुका लागि सेनेटरी प्याड डिस्पोजल मेसिनको आवश्यकता भएकाले वडामा प्रस्तावना पेश गरेको जानकारी गराए ।

वडा सचिव चन्द्रावती वाग्लेले विशेषगरी महिला शिक्षाको प्रवद्र्धनका लागि सबैको चासो रहनुपर्ने उल्लेख गरिन् । कार्यक्रममा प्राध्यापक संघका सभापति डा. भूमिराज बस्ताकोटी लगायतले शुभकामना मन्तव्य राखेका थिए । कार्यक्रममा पोखरा महानगरपालिका वडा नम्बर ३ का जनप्रतिनिधि, क्याम्पस व्यवस्थापन समितिका सदस्य, प्राध्यापक, कर्मचारी, छात्रा कल्याण समितिका पदाधिकारी र छात्राहरूको उल्लेखनिय उपस्थिति थियो । कार्यक्रम क्याम्पसका सहायक क्याम्पस प्रमुख चित्रबहादुर श्रेष्ठले सञ्चालन गरेका थिए ।