पोखरा ।

पृथ्वीनारायण क्याम्पस नेपाली विभागले साहित्यसिद्धान्त विमर्श गर्ने भएको छ । ‘साहित्यमा विभञ्जनः विधा मिश्रण र विघटन’ विषयमा प्राडा लक्ष्मण गौतमले कार्यपत्र प्रस्तुत गर्ने छन् ।

समीक्षाका कुरा विषयमा प्राडा भवानी पाण्डेले कार्यपत्र प्रस्तुत गर्ने कार्यक्रमको तयारी अन्तिम चरणमा पुगेको विभागीय प्रमुख प्राडा कुसुमाकर न्यौपानेले बताए । नेपाली भाषाको साहित्य सिद्धान्तले लिक छाड्न लागेका बेलामा सरोकारवालालाई झक्झक्याउन यो कार्यक्रम फलदायी हुने प्राडा न्यौपानेको भनाइ छ ।

कार्यक्रममा नेपाली भाषा प्राध्यापन गर्ने शिक्षक, विद्यार्थी सहभागी हुनेछन् । नेपाली भाषाका विभिन्न विधाका मानक क्रमश भत्कँदै जाँदा पर्ने असरका बारेमा घनीभूत छलफल कार्यक्रममा गरिने प्राडा गौतमले बताए ।

पृना नेपाली विभागले हालै नेपाली भाषाको मानकका विषयमा बृहत छलफल गरेको थियो । यस्ता कार्यक्रमले नेपाली भाषाको श्रीवृद्धिमा थप टेवा पुग्ने, अनुसन्धान र अध्ययनमा लागेकाहरुलाई समेत सहयोग पुर्‍याउने विश्वास आयोजकको छ ।