पोखरा ।
गण्डकी प्रदेशमा एम्बुलेन्सको निशुल्क हटलाइन नम्बर १०२ मंगलबारदेखि सञ्चालनमा आएको छ । गण्डकी प्रदेश सरकारको सामाजिक विकास तथा स्वास्थ मन्त्रालयमातहत यो सेवा सञ्चालन हुनेछ ।

सामाजिक विकास तथा स्वास्थ मन्त्री सुशीला सिम्खडाले १०२ मा फोन गरी गण्डकी प्रदेश भरिएका जनताले सेवा लिन सक्ने जानकारी दिइन् । यसअघि नेपाल टेलिकम र अन्य व्यवस्थापन प्रणालीमा आएका समस्याले एम्बुलेन्सको निशुल्क हटलाइन सेवा प्रभावकारी हुन सकेको थिएन । गण्डकी सरकारले अस्पतालमा प्रयोग हुने रगत प्रदेशका बासिन्दाका लागि सित्तैमा उपलब्ध गराउँदै आएको छ ।

अहिले गण्डकी प्रदेशमा क र ख वर्गका एम्बुलेन्स सञ्चालनमा छन् । ‘क’ वर्गका एम्बुलेन्समा आइसियुसहितको सेवा हुन्छ भने ‘ख’ वर्गका एम्बुलेन्समा तालिम प्राप्त स्वास्थकर्मी हुन्छन् ।

अहिले गण्डकी प्रदेशमा विभिन्न संस्था, सरकारी र गैरसरकारी निकायसँग गरी १ सय २२ एम्बुलेन्स छन् । तीमध्ये ३८ वटा एम्बुलेन्स १०२ मा फोन गरी प्रयोग गर्न सकिने जनाइएको छ । डा. नारायण श्रेष्ठले हटलाइन शाखामा अहिले जनशक्ति कम भएको जनाउँदै केही समयमा जनशक्ति थपेर चुस्त सेवा दिने प्रतिवद्धता गरे ।

सामाजिक विकास तथा स्वास्थ्य मन्त्रालयका स्वास्थ्यतर्फका सचिव विनोदविन्दु शर्माले केही व्यवस्थापन गरी यो सेवालाई अझै प्रभावकारी बनाउँदै लगिने जनाए ।