पोखरा ।
राष्ट्रिय परीक्षा बोर्डले मंगलबार सार्वजनिक गरेको कक्षा १२ को परीक्षाफलमा पोखराको मदरल्यान्ड माध्यमिक विद्यालयका ३ विद्यार्थीले ३.९६ जिपिए ल्याएका छन् । यो नतिजाका साथ विद्यालय देशमै सर्वोत्कृष्टको बनेको संस्थापक प्राचार्य नारायण बरालको दाबी छ ।

३.९६ जिपिए ल्याउनेमा विज्ञान समूहका जीवन अधिकारी र कृतिका थापा छन् भने व्यवस्थापन समूहका राजेश पौडेल छन् । पढाइका साथ अतिरिक्त गतिविधिमा पनि अब्बल अधिकारी र थापा जिल्ला तथा प्रदेश स्तरीय विभिन्न कार्यक्रममा सहभागी भई पुरस्कृत हुने गरेको विद्यालयले जनाएको छ ।

यस वर्ष कक्षा १२ को बोर्ड परीक्षामा मदरल्यान्डको विज्ञान समूहमा २ सय २६ र व्यवस्थापन समूहमा १ सय ३० गरी ३ सय ५६ विद्यार्थी सहभागी थिए । तीमध्ये ५२ जनाले ३.६० देखि ४.० जिपिए, १ सय ५७ जनाले ३.२० देखि ३.६० जिपिए ल्याएका छन् । १ सय ९ जनाले २.८० देखि ३.२० जिपिए तथा १८ जनाले २.४० देखि २.८० जिपिए पाएका छन् ।

गत वर्षको कक्षा १२ को बोर्ड परीक्षामा मदरल्यान्डबाटै सम्राट ढुंगानाले ३.८८ जिपिए ल्याएर गण्डकी प्रदेशमा सर्वोत्कृष्ट बनेका थिए । मदरल्यान्ड २०७९ को एसइईको नतिजाका आधारमा संस्थागत विद्यालयतर्फ कास्की प्रथम हुन सफल भएको छ । मदल्यान्ड बेला बेलामा प्रदेश प्रथम तथा २०७५ को एसइईको नतिजाका आधारमा नेपालभरिमै संस्थागत विद्यालयतर्फ प्रभम भई पुरस्कृत भएको थियो ।