पोखरा ।
महिलाको मानसिक तथा शारीरिक विकासमा सहयोग पुर्‍याउन वुमेन्स क्लब अफ पोखराले ३५ वर्ष माथिका महिलाका लागि खेलकुदका गतिविधि गर्न लागेको छ । ‘स्वास्थ्य तथा सुन्दरताका लागि खेलकुद’ भन्ने नाराका साथ भदौ १६ गते पोखरा रंगशालामा खेलकुदका कार्यक्रम गर्न लागेको क्लब अध्यक्ष सारिका गुरुङले बताइन् ।

‘खेलकुदका कार्यक्रममा उमेर अनुसारको खेल ह्यान्डबल, बेलुन रेस र रस्साकस्सीलाई प्राथमिकतामा राखिएको छ,’ अध्यक्ष गुरुङले भनिन्, ‘महिला घर परिवारका मेरुदण्ड हुन् । महिला स्वस्थ रहे घर परिवारलाई स्वस्थ र समुन्नत बनाउन सहयोग पुग्छ ।’ समग्र खेलकुद गर्नका लागि ३ लाख खर्च लाग्ने अनुमान गरिएको छ ।

प्रतियोगितामा प्रथम द्वितीय र तृतीय हुनेले ३० हजार, २० हजार र १० हजार नगद पुरस्कार पाउने छन् । अध्यक्ष गुरुङले खेलकुद कार्यक्रममा ८ टिमले भाग लिने बताइन् । टिम दर्ता शुल्क ५ हजार कायम गरिएको छ । उनले ३५ वर्षभन्दा माथिका महिलालाई शारीरिक र मानसिक रुपमा स्वस्थ भएर सक्रिय र जागरुक बनाउन खेलकुद कार्यक्रमले सहयोग पुग्ने दाबी गरिन् ।