यातायात व्यवसायी हुँदै काष्ठ उद्योग व्यवसाय क्षेत्रमा प्रवेश गरेको २२ वर्षको अनुभव संगालेर २०७२ सालदेखि लेखनाथ उद्योग वाणिज्य संघमा प्रवेश गरेको थिएँ । विभिन्न तह पार गर्दै अहिलेका लागि मेरो उम्मेदवारी प्रथम उपाध्यक्षमा छ । युवा व्यवसायीका नामले चिनिँदै सर्वप्रथम एसोसिएट सदस्य, दोस्रो पटक खुला सदस्य, उपमहासचिव र वर्तमान कार्यसमितिको महासचिवको निर्वाचनमा समेत लोकप्रिय मतका साथ विजयी भएकाले पनि यस पटक पनि सोचे अनुरुपकै परिमाण आउनेमा म विश्वस्त छु ।

महासचिव हुँदा संघको सचिवालय व्यवस्थापन लगायतमा उत्कृष्ट कार्य गरेको अनुभव र मेरो कामप्रति अग्रजहरुले गरेको विश्वास, उहाँहरुको सल्लाह, सुझाव तथा लेखनाथ उद्योग वाणिज्य संघका उद्योगी, व्यवसायीको भावनालाई प्रतिनिधित्व गर्दै संघको हितमा म सधैं अग्रमोर्चामा रहेर विश्वास समेत दिलाउन चाहन्छु । १४ औं महाधिवेनका लागि तयार भएको प्रतिवद्धता पत्रलाई आधार मानी व्यवसायीको हित, आर्थिक पारदर्शिता, संस्थागत विकास र सामाजिक कार्यलाइै सँगै लैजाने उद्देश्य अनुरुप नागरिक परोपकार समन्वय संस्थाको आर्थिक संयोजक हुँदा देखाएको आर्थिक पारदर्शिता म संघमा पनि लागू गर्ने छु । त्यो आम व्यवसायीले देखाएकोे सहानुभूति नै मेरो चुनाव जित्ने आधार हो ।

संघको वर्तमान कार्यसमितिमा महासचिव हुँदा जसरी १ हजार ८ सय ६६ व्यवसायीलाई आफ्नै परिवार सम्झेर सुखदुःखमा साथ दिइएको थियो, त्यसमा कत्ति पनि कमी आउन नदिई आगामी कार्यकालमा पनि सहकार्यमा रहिरहने विश्वाससमेत दिलाउन चाहन्छु । संघको संस्थागत हितका सवालमा मैले सधैं अग्रमोर्चामा रहेर काम गर्दै आएको छु । अब प्रथम उपाध्यक्ष भएर कुर्चीमाा मात्र रहने होइन, व्यवसायीको हितको लागि अग्रपंक्तिमा रहनेछु । संस्थाको हित र समाजप्रतिको दायित्वलाई कहिल्यै भुल्दिनँ ।

देशमा व्याप्त आर्थिक मन्दीका कारण मर्कामा परेका आम व्यवसायीलाई कसरी माथि उठाउन सकिन्छ भन्ने खोजी गरिनेछ । सम्भावनाको खोजी गरिरहेका युवा व्यवसायीको हितमा लगानी मैत्री वातावरण सृजना गर्दै लेखनाथलाई कृषि र पर्यटनको क्षेत्रबाट विकास गर्नका लागि सबै तहका सरकारसँग पुलको रुपमा काम गर्नु नै मेरो अभियान रहनेछ ।