पोखरा ।
पोखरा महानगरपालिका वडा नम्बर ८ स्थित पुरानो घर आँगन रेस्टुरेन्ट एन्ड कटेज झिर हाउसमा ट्रोपिकाना स्लासमा अखाद्य वस्तु फेला परेको छ । खाद्य प्रविधि तथा गुण नियन्त्रण कार्यालय पोखराले आइतबार अनुगमन गर्दा अखाद्य वस्तु फेला परेको कार्यालयका अनुसन्धान अधिकृत दीपक कुँवरले जानकारी दिए ।

कुँवरका अनुसार आइतबार स्लासमा अखाद्य पदार्थ फेला परेको गुनासोपछि निरीक्षण गर्दा आँखाले देखिने रुपमा नै बाह्य पदार्थ देखिएको र त्यहीँ अनुसार मुुचुल्का तयार गरिएको हो । सरकारले तोकेको मापदण्ड विपरीत अनिवार्य न्यूनतम मापदण्ड तोकेको र त्यो मापदण्डअनुसार स्लास न्यून गुणस्तरको भेटिएको उनले बताए ।

कार्यालयका प्रमुख शिवजी बरालले अनुगमन गरेर रिपोर्ट प्रयोगशालामा परीक्षणका लागि पठाइएको बताए । तर, आँखाले नै प्रस्ट देख्न सकिने गरी अखाद्य वस्तु भेटिएको मुचुल्कामा उल्लेख छ । अखाद्य हो कि होइन रिपोर्टले पनि देखाउने बरालले बताए । उनले रिपार्टले खराबी देखाए उक्त झिर हाउसलाई कारबाही गरिने सुनाए ।

रेस्टुरेन्ट सञ्चालक प्रमोद मरासिनीले पानीले पखाल्ने क्रममा यस्तो भेटिएको बताएको मुचुल्कामा उल्लेख छ । विज्ञहरुले कतिपय अवस्थामा पूरा नखोलिकन अखाद्य पदार्थ नदेखिने हुँदा सबै नागरिकले जुसहरु खाँदा खोलेर अर्को भाँडामा हालेर पिउन सुझाव दिएका छन् ।