पोखरा ।
संस्कृति पर्यटन तथा नागरिक उड्डयान मन्त्री सुदन किराँतीले शनिबार पोखराको विन्ध्यवासिनी मन्दिर क्षेत्रमा सरफाइ अभियान चलाए । केही महिनादेखि हरेक शनिबार काठमाडौंको पशुपतिनाथमा सरसफाइ अभियान चलाउँदै आएका मन्त्री किराँती पोखरा आएका बेला विन्ध्यवासिनीमा अभियान गरेका हुन् ।

शनिबार बिहानै सामाजिक सञ्जालमार्फत् उनले सरसफाइमा सहभागी हुन पोखरेलीलाई आग्रह गरेका थिए । मन्दिर परिसर र वरिपरि सरसफाइपछि उनले प्रतीकात्मक रुपमा कार्यक्रम गरिएको जनाए ।

मन्त्री किराँतीले भने, ‘यहाँ धेरै नै फोहोर भएकाले सफाइ गरिएको होइन, सबै प्राकृतिक, सांस्कृतिक, पर्यटकीय सम्पदा सफा राखौँ भन्ने सन्देश दिन खोजिएको हो । अहिले संस्कृति धेरै तवरले विकृत भएको छ, त्यसलाई सफा गर्नु जरुरी छ ।’ शनिबार बिहानै ७ बजे मन्दिर पुगेका मन्त्री किराँतीलाई विन्ध्यवासिनी धार्मिक क्षेत्र विकास समिति, सुरक्षा निकाय र स्थानीयले साथ दिएका थिए ।

उनले मन्दिरमा भेटिएका केही सर्वसाधारणसँग मन्दिरको अवस्था र तत्काल गर्नुपर्ने कामबारे पनि सोधेका थिए । समितिका सचिव तीर्थ श्रेष्ठले सरफाइमा मन्त्री किराँती सहभागिता र चासोले आफूहरुलाई ऊर्जा थपिएको सुनाए ।