पोखरा ।
४४ औं सामाजिक सेवा दिवसको अवसरमा समुदायमा आधारित पुनस्र्थापना सेवा(सिबिआरएस)नेपालले वडा स्तरीय अपांगता समन्वय समितिका पदाधिकारीलाई नेतृत्व विकास तालिम दिएको छ । तालिममा कास्कीको अन्नपूर्ण, माछापुच्छ्रे गाउँपालिका, स्याङजाको कालिगण्डकी गाउँपालिका र गल्याङ नगरपालिकाका २० वडा ४० जनाको सहभागिता रहेको संस्थाका अध्यक्ष चेतबहादुर गुरुङले जानकारी दिए ।

तालिममा संस्थाका कार्यक्रम व्यवस्थापक कृष्ण लामिछाने स्वावलम्बन समूहको महत्व र फाइदा, संस्थाका पुनस्र्थापना व्यवस्थापक रुद्र थापाले कोष संकलन विधि तथा तरिका र वार्षिक कार्ययोजना निर्माण, संस्थाका सामाजिक सशक्तीकरण व्यवस्थापक विदुर कोइरालाले वकालत र पैरवीः चरण र विधिहरु विषयमा सहजीकरण गरेका छन् ।

कार्यक्रममा सफल स्वावलम्बन समूहका नेतृत्वकर्ताको अनुभव आदानप्रदान तथा संघर्षशील अपांगता भएका व्यक्तिको सफलताका कथाहरु प्रस्तुत गरिएको संस्थाका कार्यक्रम व्यवस्थापक लामिछानेले बताए । तालिममा सहभागीलाई फेवाताल, तालबाराही, पातलेछाँगो, शान्ति स्तूप र पुम्दीकोट लगायत पर्यटकीय र धार्मिक स्थलको अवलोकन गराइएको छ ।

कार्यक्रममा एओएस बालग्रामका कार्यक्रम अधिकृत प्रकाश भुषालले अपांगता भएका व्यक्तिको परिवारलाई सबलीकरणका लागि सहकार्य गरेको जानकारी दिए । सबै सरोकार वाला निकायको सहकार्यमा अपांगता भएका व्यक्तिलाई विकासको मुल धारमा ल्याउनुपर्ने उनले उल्लेख गरे ।

सिवआरएस नेपालका सल्लाहकार डा भोजराज न्यौपानेले अपांगता भएको व्यक्तिलाई घर परिवारमा पुगेर संस्थाले सेवा प्रदान गरेको बताए ।