पोखरा ।
डेंगी संक्रमण रोकथाम तथा नियन्त्रणका लागि पोखरा महानगरपालिका वडा नम्बर ९ मा लामखुट्टेका लार्भा खोज तथा नष्ट अभियान थालिएको छ ।

नेपाल रेडक्रस सोसाइटी उपशाखा पोखरा ९ को व्यवस्थापनमा संक्रमणको उच्च जोखिम क्षेत्रमा अभियान चलाएको नेपाल रेडक्रस सोसाइटी कास्कीका डेंगी रोकथाम तथा प्रतिकार्य कार्यक्रमका फोकल पर्सन नवराज भण्डारीले जानकारी दिए । पोखरा उपमहानगरपालिका वडा नम्बरका अध्यक्ष दीपेन्द्र मर्सानीको नेतृत्वमा पानी जम्ने ठाउँ, सवारी साधनका टायर, लामखुट्टे लुक्ने झाडी कुना खोज सरसफाई गरिएको छ ।

पोखरा ९ को वडा कार्यालय, सहरी स्वास्थ्य केन्द्र, सामुदायिक सेवा केन्द्र पृथ्वीचोकको अुगवाईमा वडाको पृथ्वीचोक बसपार्कल वर्कसपहरुमा लामखुट्टेको लार्भा खोज तथा नष्ट र सरसफाई अभियान गरिएको छ । अभियानको क्रममा ठाउँ ठाउँमा माइकिङसमेत गरिएको छ । सामुदायिक सेवा केन्द्र पृथ्वीचोकका सचिव उत्तम जोशीले महेन्द्रपुल, साँघुको मुख, बास्तोलाथर, सेतीगंगा टोल, तमुधि मार्ग हुँदै संग्रहालय मार्गसम्म अभियान गरिएको बताए ।

उनले वडाका विभिन्न क्षेत्रमा सरोकारवाला निकाय, टोल विकास संस्था, महिला स्वास्थ्य स्वयं सेविका, स्वास्थ्यकर्मीले ३ पटकसम्म घरदैलो सहितको अभियान गरेको जानकारी दिए । नेपाल रेडक्रस सोसाइटी कास्कीका डेंगी रोकथाम तथा प्रतिकार्य कार्यक्रमका फोकल पर्सन भण्डारीले डेंगीबाट आफू जोगिन र अरुलाई जोगाउन लामखुट्टेको लार्भा खोज तथा नष्ट अभियान महत्वपूर्ण रहेको बताए ।

रेडक्रस तथा रेडक्रिसेन्ट सोसाइटीको अन्तराष्ट्रिय महासंघ (आइएफआरसी)सँगको सहकार्यक्रमा डेंगी संक्रमण रोकथाम तथा नियन्त्रण सम्बन्धी सचेतनामूलक कार्यक्रम भएका छन् ।

नेपाल रेडक्रस सोसाइटी पोखरा ६ उपशाखाका सहसचिव तुलसी दाहालले नेपाल रेडक्रस सोसाइटी कास्कीको अन्तरउपशाखा हातेमालो कार्यक्रम अनुसार पोखरा ६ बैदाम र माछापुच्छ्रे ४ लाहाचोक बीच सहयोग आदान प्रदान गरिएको जानकारी दिए । कार्यक्रममा १२ थान कुर्ची, १ टेबल, १ दराज हस्तान्तरण गर्नुका साथै डेंगु संक्रमण रोकथाम नियन्त्रणसम्बन्धी अभिमुखीकरण गरिएको छ ।

कार्यक्रममा माछापुच्छ्रे ४ का वडा अध्यक्ष मधुसुदन अधिकारी, रेडक्रस कास्कीका उपमन्त्री रमा कोइराला, रेडक्रसकर्मीहरु भेषराज अधिकारी, केशवलाल पौडेल लगायतल अभियानका बारेमा बोलेका थिए ।

यसैबीच, नेपाल रेडक्रस सोसाइटी कास्कीले डेंगी संक्रमण रोकथाम, नियन्त्रण अभियान अन्तर्गत पोखरा महानगरपालिकाका महिला स्वास्थ्य स्वयंसेविकालाई तालिम दिएको छ । तालिममा ४० महिला स्वास्थ्य स्वयंसेविकाको सहभागिता थियो । तालिममा डेंगी रोकथाम तथा प्रतिकार्य कार्यक्रमका फोकल पर्सन भण्डारीले सहजीकरण गरेका छन् ।

कार्यक्रममा नेपाल रेडक्रस सोसाइटी कास्कीका सभापति डण्डराज शर्मा, उपसभापति उर्मिला खड्का, उपमन्त्री रमा कोइराला, महिला स्वास्थ्य स्वयं सेविका सञ्जाल पोखराका संयोजक भीमा पौडेल, रेडक्रसकर्मी सुनिता पौडेल लगायतले सबै सरोकारवालाको समन्वय र सहकार्यबाट डेंगी संक्रमण रोकथाम तथा नियन्त्रण गर्न सकिने बताए ।