काठमाडौं ।

एनसेलले सम्पूर्ण पारा खेलाडीहरुको सीप विकास र प्रशिक्षणका लागि राष्ट्रिय पारालिम्पिक कमिटी (एनपीसी) नेपालसँग सहकार्य गरेको छ । यही कात्तिक ५ देखि ११ गतेसम्म चीनको हृङजाओ सहरमा हुने चौथौं पारा एसियन गेम्समा जाने खेलाडी तथा प्रशिक्षकलाई एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले शुभकामना दिएका छन् ।

यस वर्ष पारा एसियन गेम्समा विभिन्न १० खेलमा नेपालका १९ पारा खेलाडी सहभागी हुँदै छन् । एथलेटिक्स, ब्याडमिनटन, साइकलिङ, पौडी, टेक्वान्दो, जुडो, पावर लिफ्टिङ, सुटिङ र टेबलटेनिस खेलमा नेपाल सहभागी हुनेछ ।

प्रबन्ध निर्देशक जाब्बोर कायुमोभले पारा खेलाडीहरु हौसला र साहसका एक उदाहरण र प्रेरणाका स्रोत भएको बताए ।
‘भिन्न क्षमता भएका वर्गलाई सम्मान गर्दै उहाँहरुको सपनालाई साथ दिएर अधि बढाउन सहयोग गर्न एनसेल सदैव तत्पर छ । एनसेल र एनपीसीको यो सहकार्यले धेरैभन्दा धेरै पारा खेलाडीहरुको विकासमा सहयोग पुर्याउने विश्वास लिएका छौं,’ उनले भने ।

यस एसिएन गेम्सका लागि चिफ–डि–मिसनको रुपमा एनपीसिका कोषध्यक्ष ओमनाथ शिवाकोटी छन् । एसियन गेम्स २०२२ एक प्रतिस्पर्धा मात्र नभई हाम्रा राष्ट्रिय पारा खेलाडीलाई अन्तराष्ट्रिय स्तरमा खेल खेल्न सक्छन् भनेर प्रमाणित गर्ने एक महत्वपुर्ण प्लेटर्फम पनि हो ।