धेरै वर्षदेखि जारी गाजा क्षेत्रको विवाद अझै सुल्झिएको छैन । इजराजय र प्यालेस्टाइनबीच फेरि युद्ध भएको छ । अस्पतालमै समेत आक्रमण भएका छन् । संयुक्त राष्ट्र संघले जारी युद्ध रोक्न भने पनि इजरायलले युद्धविराम गर्न अस्वीकार गरेको छ । पहिलो विश्व युद्धपछि स्थापना भएको लिग अफ नेसनले दोस्रो विश्व युद्ध रोक्न सकेन । फलस्वरुप विश्वले ठूलो मूल्य चुकायो । त्यसपछि संयुक्त राष्ट्रसंघ स्थापना भयो ।

विश्व शान्ति, सहकार्य, सहअस्तित्व, स्वतन्त्रता र मानवताको पक्षमा काम गर्ने विश्वका सबैजसो देश सम्मिलित संयुक्त राष्ट्र संघबाट विश्वमै ठूलो अपेक्षा गरिन्छ । राष्ट्रसंघको स्थापनापछि पनि विश्वमा अनेकौं युद्ध भएका छन् । अहिले अस्पताल जस्तो अत्यावश्यक सेवा दिने निकायमाथि भएको आक्रमणको नेपालले समेत विरोध जनाएको छ । मध्य एसियाका अधिकांश देशबाट यस क्रूर र अमानवीय घटनाको विरोध भएको छ ।

सो आक्रमणमा मृत्यु हुनेमा अधिकांश बालबालिका र ज्येष्ठ नागरिक छन् । इजरायली आक्रमणमा परेर मृत्यु भएका गाजा क्षेत्रका सर्वसाधारणमध्ये केही अस्पतालमा शरण लिन पुगेका थिए । सो घटनाको इजिप्ट, अरब, इरानलगायत मुलुकले कडा आपत्ति जनाएका छन् । यसअघि प्यालेस्टेनी विद्रोही समूह हमासको आक्रमणमा परी १० नेपाल विद्यार्थीको मृत्यु भएको थियो । एक नेपाली विद्यार्थी अझै वेपत्ता छन् ।

हमासले २० असोजमा इजरायलको म्युजिक कन्सर्टमा एकाएक आक्रमण गरेपछि त्यसको प्रतिकारमा इजरायलले लगातार हवाई र रकेट आक्रमण जारी राखेको छ । हमासले गैरसैनिक नागरिकलाई समेत बन्धक बनाएर इजरायललाई धम्की दिएपछि ती नागरिकलाई छुटाउन र हमासलाई निमिट्यान्न बनाउन लगातार आक्रमण जारी राखिएको छ । इजरायलले गाजा क्षेत्रमा पानी, विद्युत् र इन्धन आपूर्ति ठप्प पारेको छ । बंकरमा बसेका जनता भोकभोकै मर्ने अवस्थामा छन् । इजरायलको चेतावनीपछि अहिले गाजाका लाखौं प्यालेस्टाइनी विस्थापित भइसकेका छन् । कतिपय इजिप्टको सिमानामा अलपत्र छन् ।

इजरायली कारबाही र प्यालेस्टाइनी लडाकू समूहहरूबीच भएको युद्धमा अहिलेसम्म ५ हजारभन्दा बढी मारिएका छन् । आक्रमणमा २० हजार हाराहारीमा घाइते भएका छन् । अस्पतालमा विस्फोट भएपछि बढी चिन्तित देखिएको अन्तर्राष्ट्रिय समुदायले शान्ति स्थापना गर्ने जोड दिएको छ । यसअघि रुस र युक्रेन युद्धले विश्वभर संकट ल्याएको थियो । त्यो युद्धको असर अझै बाँकी छ । अमेरिकी राष्ट्रपति जो वाइडनले हमासविरुद्धमा आफ्नो समर्थन जारी रहेको बताएका छन् ।

वाइडनले विश्वका आतंकवादलाई ध्वस्त पार्न अमेरिकाको सहयोग निरन्तर रहने बताएका छन् । तर हमासलाई सिध्याउने बहानामा निहत्था प्यालेस्टाइनीमाथि आक्रमण रोक्नुपर्छ । हमासको गल्तीलाई भने कदापि स्वकार्नु हुँदैन । शान्ति स्थापना गर्न विश्वका शक्तिशाली राष्ट्र एकजुट हुनुपर्छ । त्यसको लागि संयुक्त राष्ट्र संघले मुख्य भूमिका खेल्नुपर्छ ।