म्याग्दी ।
विसं २०८० सुरु भएयता म्याग्दीको अन्नपूर्ण गाउँपालिका ६ स्थित घोडेपानी–पुनहिल क्षेत्रमा १४ हजारभन्दा बढी पर्यटकले भ्रमण गरेका छन् ।

विसं २०८० को वैशाख १ देखि कात्तिक १३ गतेसम्म १४ हजार ४ सय २१ पर्यटकले घोडेपानी पुनहिल क्षेत्रको भ्रमण गरेको पर्यटक प्रहरी चौकी घोडेपानीले जनाएको छ । चौकीका प्रहरी हवल्दार रामबहादुर केसीले घोडेपानी–पुनहिल क्षेत्रमा कोरोना महामारी सुरु हुनुअघिकै हाराहारीमा पर्यटक आउन थालेको जनाए ।

‘घोडेपानी भित्रिने र बाहिरिने पर्यटकको विवरणसहितको अभिलेख र तथ्यांक राख्ने गरेका छौँ’, उनले भने, ‘वैशाखदेखि यता ११ हजार २ सय ३१ पर्यटक भित्रिएका र ३ हजार १ सय ९० पर्यटक घोडेपानी हुँदै अन्यत्र गएका छन् ।’

वैशाखमा ४ हजार ४ सय १४, जेठमा १ हजार २ सय ८३, असारमा ४ सय ५०, साउनमा ९ सय २९, भदौमा ९ सय ७२, असोजमा ४ हजार २ सय ९८ र कात्तिकको १३ गतेसम्म २ हजार ७५ पर्यटक आएको चौकीले जनाएको छ ।

घोडेपानीका होटल व्यवसायी टोल सुधार समितिका अध्यक्ष वीरेन गर्बुजा पुनले विदेशीसँगै स्वदेशी पर्यटकको पनि चहलपहल बढेको सुनाए । ‘अनुकूल मौसम र चाडपर्वको बिदाको समय भएकाले आन्तरिक पर्यटकको आगमन पनि राम्रो छ’, उनले भने, ‘कोरोना महामारीपछि पर्यटक आगमन पुरानै लयमा फर्कन थालेको छ ।’

विसं २०७९ मा २६ हजार ३ सय ११ पर्यटकले घोडेपानी पुनहिल क्षेत्रको भ्रमण गरेको तथ्यांक पर्यटक प्रहरी चौकीको छ । समुन्द्र सतहदेखि ३ हजार २ सय मिटर उचाइमा अवस्थित पुनहिलमा सूर्योदय, गुराँसे जंगल र हिमशृङ्खलाको अवलोकन गर्न आउने पर्यटक घोडेपानीमा बास बस्ने गर्दछन् ।

घोडेपानीमा साना ठूला गरी ३० होटल छन् । पुनहिल प्रवेश शुल्क र पुनहिलमा चिया पसल सञ्चालन गर्न अन्नपूर्ण गाउँपालिकाले चालु आर्थिक वर्षका लागि माइला दाइ होटल तथा रेष्टुरेन्टसँग ६३ लाख ११ हजारमा ठेक्का सम्झौता गरेको छ । पुनहिल प्रवेश गर्न नेपालीले ५० र विदेशीले १ सय ५० प्रतिव्यक्तिका दरले शुल्क तिर्नुपर्छ ।

पुनहिलबाट धौलागिरि, सिस्ने, गुर्जा, मानापाथी, निलगिरि, अन्नपूर्ण, माछापुच्छ्रे, मनास्लु हिमालको अवलोकन गर्न सकिन्छ । सूर्योदयको दृष्य अवलोकन गर्न पाउनु पनि पुनहिलको अर्को विषेशता हो । घोडेपानी र पुनहिल क्षेत्रमा गण्डकी प्रदेशकै ठूलो लालीगुराँसको जंगल छ ।

अन्नपूर्ण परिक्रमा गरी तातोपानी हुँदै कास्कीको वीरेठाँटी–उल्लेरी, छोम्रोङ–घान्द्रुक–टाडापानी, नागी–महरे हुँदै गरी ४ वटा नाकाबाट पर्यटक घोडेपानी भित्रिने गरेका छन् । नेपाली पर्यटकको अभिलेख राख्ने गरिएको छैन । म्याग्दीको पोखरेबगर घार शिख चित्रे हुँदै घोडेपानी सडकमा सवारी साधन भएर पुग्न सकिन्छ । घोडेपानीमा बास बस्ने पर्यटक एका बिहानै पुनहिल भ्रमणमा जाने गर्दछन् ।