पोखरा ।
बालिकालाई यौन दुव्र्यवहार गर्ने १ जनालाई जिल्ला अदालत कास्कीले बुधबार ३ महिना कैद फैसला सुनाएको छ । गएको असार २३ गते आफ्नो घरमा बोलाई ५५ वर्षीय गम्भीरबहादुर सार्कीले बालिका परिवर्तित नाम ‘२०७९ पोखरा (९१)’लाई दुव्र्यवहार गरेका थिए ।

यौनजन्य अस्वभाविक कार्य गरेको अभियोगमा न्यायाधीश केशवप्रसाद बास्तोलाको एकल इजलासले सार्कीलाई ३ महिना कैद फैसला गरेको हो । आदेशमा पीडित बालिकालाई ५ हजार क्षतिपूर्ति र ३ हजार जरिवाना तिराउनेसमेत उल्लेख छ ।

आफ्नी छोरीलाई ललाईफकाई यौनजन्य अस्वभाविक कार्य गरेको भन्दै बालिकका बुबाले जिल्ला प्रहरी कार्यालय कास्कीमा असार २४ गते उजुरी दिएका थिए । पोखरा ५ घर भएका सार्कीलाई घटना भएकै दिन प्रहरीले नियन्त्रणमा लिएको थियो । जाहेरी परेपछि मुचुल्कासँगै प्रहरीले असार २८ गते बालिकाको स्वास्थ्य परीक्षण गराएको थियो ।

जिल्ला अदालतले गम्भीरसँग साउन १७ गते नै धरौटी माग गरे पनि उनले रकम बुझाएनन् । त्यसपछि बयान, बकपत्र लिएपछि कात्तिक १५ गते ३ महिना कैद फैसला भएको हो ।

बालिकाको परिवार गम्भीरको घर नजिकै बस्थ्यो । सोही क्रममा पीडित बालिका र ५५ वर्षीय गम्भीरको चीनजान भयो । असार २३ गते बेलुका ५ बजे घरबाहिर खेलिरहेकी बालिकालाई बोलाएर गम्भीरले दुव्र्यवहार गरेका थिए । बालिकासँगै खेल्दै गरेकी एक युवतीले गम्भीरले आफूलाई पनि तानेकोमा फुत्किएर भागेको बयान दिएकी थिइन् ।